Menu

La eurodiputada d'IX pregunta al ministru de Salú y Trabayu d'Estonia sobro los retayos nel financiamientu a les ONG que lluchen polos derechos de les muyeres nel so país y apura a actuar por que los Estaos miembros ratifiquen y empiecen a aplicar el Conveniu d'Istambul.

La eurodiputada d'Izquierda Xunida Ángela Vallina reclamó esti miércoles al ministru de Salú y Trabayu d'Estonia, Jevgeni Ossinovski, qu'impulse midíes polítiques concretes pa promover la igualdá na Unión Europea, mientres la Presidencia de vez qu'acaba d'asumir el so país. La parllamentaria, nuna sesión de la comisión de Derechos de la Muyer, alvirtió qu'ensin voluntá política, va ser imposible que se algamaren los oxetivos que la mesma Unión se punxo pal añu 2020.

“Según l'índiz ellaboráu pol Institutu Européu d'Igualdá de Xéneru (EIGE, poles sos sigles n'inglés), la igualdá media na UE ye del 52,9%, daqué dafechu insatisfactorio. Ensin midíes eficaces pa promover la igualdá, nun se van llograr los oxetivos en materia d'igualdá que la mesma estratexa de la UE marcóse pa esi añu”, afirmó Vallina.

La eurodiputada foi esbillando delles cifres que denoten la gran fienda de xéneru qu'esiste nel conxuntu de la UE en plenu 2017. Por casu, “precisaríense 70 años p'algamar la igualdá salarial, 40 años por qu'haya una repartida equitativo nes xeres del llar, 30 años pa llograr una tasa d'emplegu similar ente homes y muyeres, y 20 años por que la representación política de cada xéneru sía equilibrada”.

Vallina aprovechó la presencia de Ossinovski pa preguntar poles midíes que piensa poner en marcha la Presidencia estonia p'amenorgar diches diferencies ya interesóse tamién pol so puntu de vista sobro la conciliación familiar.

Per otru llau, la eurodiputada d'IX recordólu que la UE marcó 2017 como l'añu de la llucha contra la violencia machista. Vallina esplicólu que “no que llevamos d'añu, 34 muyeres fueron asesinaes poles sos pareyes o exparejas nel mio país”, lo que constitúi “xuna víctima cada cinco díes”. Amás, treslladó-y les denuncies de les organizaciones estonies que formen parte del Lobby Européu de Muyeres, qu'acusen al Gobiernu de “nun dexa-yos emprestar asesoramientu xurídicu y psicolóxicu a les víctimes”. La eurodiputada preguntó-y coles mesmes polos retayos nel financiamientu a eses ONG, sobro lo que nun llogró respuesta.

Y en informándo-y de que'l martes “adoptamos precisamente nesta comisión xuntu cola de Llibertaes el nuesu resolvimientu encamentando a una rápida ratificación y implementación del Conveniu d'Istambul sobro prevención y llucha contra la violencia contra la muyer y la violencia de xéneru”, Vallina preguntó-y poles “midíes concretes” que va adoptar la Presidencia d'Estonia “pa impulsar el so procesu de ratificación por tolos Estaos miembros y p'aprovir servicios y sofitu efectivu a les víctimes de la violencia machista, incluyíes les muyeres abellugaes”.