Menu

La formación espulsó cautelarmente al so ex conceyal al desoyer el mandatu de l'Asamblea local pa romper el pactu col PSOE

Izquierda Xunida esixó güei respetu a les sos decisiones internes y recordó al Alcalde de Valdés, Simón Guardado, que la formación escarez de representantes na Corporación, por culpa de que el fasta agora conceyal foi expedientáu y espulsáu cautelarmente dempués de que se declarara en rebeldía a les decisiones de rotura del pactu de Gobiernu alcordaes pola agrupación local d'esi conceyu. El coordinador xeneral d'IX Asturies, Ramón Argüelles, y la secretaria de Política Municipal, Gabriel Álvarez, visitaron güei el conceyu, ónde aportunaron en que la representación d'IX decidierase pola so propia afiliación y militancia. “Tamos ensin conceyal en Valdés y por eso venimos güei a reforzar a la dirección (local) pa poder presentar una candidatura dientro de 2 años y que podamos ver que somos útiles a la sociedá en Valdés”, resaltó Argüelles.

El coordinador xeneral recordó que'l yá ex conceyal d'IX “nun representa la nuesa organización”, de resultes de los enfrentamientos cola asamblea local de Valdés, dempués de qu'ésti desoyera los mandatos de romper el pactu de Gobiernu colos socialistes, a pesar de que la mayoría de los miembros de la organización asina lo decidieren democráticamente. “N'Izquierda Xunida les decisiones tómense n'Asamblea y los dirixentes, inclusive yo, nun puen saltar esos alcuerdos”, concluyó Ramón Argüelles.

Pa Gabriela Álvarez naide sacantes la mesma Izquierda Xunida ye quién pa decidir quién la representa y quién non. Nesti sentíu, señaló qu'amás de la comunicación al Conceyu, pol rexistru municipal, de la situación d'espulsión del que fuera'l so conceyal en Valdés, va treslladar tamién a la FSA la so esixencia de respetu a les decisiones internes. El conceyal, nestos momentos, nun forma parte d'IX y, sía que non, nun ta autorizáu a falar en nome de la formación, máxime dempués de declarase en rebeldía frente a les decisiones democráticamente adoptaes nel senu de la so agrupación.

Gabriela Álvarez amosó tol respaldu d'IX Asturies a l'agrupación de Valdés, de la que destacó'l so trabayu y compromisu. Nesti sentíu, fixo un llamamientu por que cualesquier que precise sofitu puea ponese en contactu cola formación nel conceyu bien al traviés de la coordinadora local, Isabel Guardáu, o del restu d'afiliación, bien conocíos