Menu

La UE tien de frenar los xuicios políticos colectivos a los activistes saharagüis y trabayar, efectivamente, pa faer realidá'l referéndum d'autodeterminación del Sáhara Occidental, que llevamos esperando dende hai 26 años”, diz la eurodiputada d'IX.

La eurodiputada d'Izquierda Xunida Paloma López promoviera una carta dientro del Intergrupu del Sáhara Occidental del Parlamentu Européu - del que ye vicepresidenta -, na que se solicita la mediación de l'Alta Representante de la Unión Europea p'Asuntos d'Esteriores, Federica Mogherini, por que Marruecos ponga en llibertá al grupu d'estudiantes saharagüis de Oudaya, deteníos hai yá más d'un añu. Dellos fueron sentenciaos a principios d'esti mes a penes d'ente trés y diez años de cárcel nun procesu xudicial que, como'l de Gdeim Izik, nun respetó los mínimos estándares internacionales.

La misiva, que roblen tanto la presidenta del Intergrupu, Jytte Guteland, como el vicepresidentes López, Ivo Vajgl, Bodil Valero y Fabio Massimo Castaldo, rellata que 12 de los 15 estudiantes de Oudaya fueron deteníos a principios de 2016 acusaos de la muerte de Omar Khalek, estudiante fináu mientres los disturbios que siguieron a una sentada pacífica d'activistes saharagüis.

El grupu “tuvo en prisión demientres 501 díes ensin que los estudiantes fueren procesaos”, lo que según indiquen los eurodiputaos yá de por sí “contravién la mesma lexislación marroquina”. Finalmente, el xuiciu empezó'l pasáu mes de mayu dempués de 12 aplazamientos.

Mientres toos esos meses los deteníos “protagonizaron delles fuelgues de fame pa denunciar les tortures y abusos” que taben sufriendo na cárcel. Como suel asoceder colos presos políticos saharagüis, estos fechos “nun fueron investigaos poles autoridaes marroquines” magar qu'inclusive la UE, tal que reconoció la mesma Mogherini en respuesta a trés entrugues parlamentaries de López, diz tratar la tema col Reinu de Marruecos “como parte del diálogu políticu” que caltien regularmente con Rabat.

Per otru llau, los observadores internacionales que participaron nel xuiciu, constataron que “la sentencia ta basada en declaraciones orales llograes so tortura”, tal que denuncien los deteníos. Esta forma d'actuar de les autoridaes marroquines, similar a la que se siguió col procesu de Gdeim Izik, tampoco foi investigada y “va claramente contra la Convención de Naciones Xuníes contra la Tortura, de la que Marruecos ye firmante”.

Los eurodiputaos creen qu'esti casu pon de relieve una vegada más la persecución política que sufren tolos activistes saharagüis de derechos humanos que defenden el lexítimu derechu d'autodeterminación del Sáhara Occidental. Amás, da bona amuesa “del racismu institucional instauráu nes universidaes marroquines”, onde los estudiantes saharagüis vense obligaos a matriculase énte l'ausencia de centros d'estudios cimeros nos territorios ocupaos del Sáhara Occidental.

Esti fechu ye pa López la demostración de que Marruecos sigue actuando como " un auténticu colonizador, al establecer clares táctiques de apartheid pa torgar l'accesu a la educación del pueblu saharagüi".

Los parllamentarios terminen la so carta a Mogherini pidiendo la so mediación pa consiguir “que les penes de cárcel sían anulaes” yá que “nun se respetó'l derechu de los deteníos a un xuiciu xustu”; que s'investiguen los "allegamientos de tortura” de los acusaos; que s'obligue a Rabat a “respetar los derechos fundamentales de los presos políticos saharagüis” y la UE faiga un siguimientu de cada casu; y que sía reconocíu'l derechu de los activistes saharagüis "a manifestase pacíficamente y defender los sos derechos”.

"Esiximos, una vegada más, la lliberación inmediata de los presos políticos saharagüis y nun escaecemos de los presos de Gdeim Izik, que'l so xuiciu volviera entamar el día 18 de xunetu, ente maniobres de dilación pa evitar la presencia d'observadores internacionales”, señaló la eurodiputada d'IX que llama a la UE a “frenar los xuicios políticos colectivos a los activistes saharagüis y trabayar, efectivamente, pa faer realidá'l referéndum d'autodeterminación del Sáhara Occidental, que llevamos esperando dende hai 26 años”..