Menu

El voceru d'IX sostien qu'el “coctel esplosivu” terminará per producir la corte de circulación d'Asturies col Pandu

El deterioru de les víes, de les catenaries y l'amenorgamientu de la velocidá de circulación, según la deficiente atención a los viaxeros son un coctel esplosivu que puede producir la corte de la circulación ferroviaria d'Asturies col Pandu a non muncho tardar. Asina d'atayante amosábase Gaspar Llamazares, voceru parlamentariu d'IX na Xunta Xeneral, sobre la situación de la rampla de Payares pola que circulen los trenes que xunen Asturies con Madrid y que derivó en qu'ayeri, de nuevu, 800 pasaxeros tuvieren que ser treslladaos per carretera. “Ye una situación inaceptable y alarmante que demuestra'l deterioru y l'abandonu”, alvirtió Llamazares pa lo qu'esixó un mayor compromisu políticu y presupuestariu del Gobiernu Central con Asturies pa terminar la Variante de Payares y l'adopción de midíes urxentes na actual vía.

Nesti sentíu, esixó al Conseyeru d'Infraestructures asturianu, Fernando Lastra, que güei s'axunta col Presidente de ADIF, qu'esixa midíes urxentes pa frenar el deterioru de la vía porque, de lo contrario, “los próximos van ser años dramáticos p'Asturies” yá que va perder el tren del desenvolvimientu y el tren de la comunicación. “Nun valen les midíes incluyíes nos presupuestos, rescampla”, alvirtió'l voceru d'IX. Denunció tamién na rueda de prensa de la Xunta Xeneral qu'en tramos de Payares yá se va a la metá de la velocidá que dexen los mesmos. Dalgunos pol estáu de la vía obliguen a circular a 30 kilómetru per hora onde les llendes yeren de 70. A xuiciu d'IX, el plantegamientu d'allongar los plazos de la Variante de Payares y caltener la rampla tradicional en serviciu ye una vía muerta, que puede tener consecuencies dramátiques. “·Xúntase'l deterioru de Payares a qu'a la nueva vía nun se ve nel horizonte”, resumió'l voceru d'IX.

IX va pidir información al Gobiernu central sobre l'avería de la catenaria que tuvo llugar ayeri porque tien constancia de que los incidentes aumenten día ente día, demostrando'l deterioru de la comunicación.