Menu

El coordinador xeneral d'IX asegura que la voluntá de diálogu y alcuerdu va demostrase en septiembre, col entamu del nuevu cursu políticu

El coordinador xeneral d'IX Asturies, Ramón Argüelles, sollertó güei de la necesidá d'un xiru a la izquierda nes polítiques del Gobiernu asturianu, a riesgu de perder “otros dos años”. El máximu responsable de la organización, manifestó la so disposición a llegar a alcuerdos siempres qu'estos vaigan dirixíos a ameyorar la situación de la mayoría de la población. “Va dos años Izquierda Xunida facilitó la investidura de Javier Fernández por dos motivos fundamentales: primero, porque nun gobernara la derecha y, segundo, por sacar alantre unes cuantes midíes, sobremanera de tipu social, medioambiental, participativu, que fueren ameyorar esta sociedá asturiana. Dos años más tarde, damos cuenta de qu'esi alcuerdu pa investir un presidente nun se cumplió prácticamente en nada y creemos que, tres dos años perdíos tenemos que camudar l'aldu o, enforma tarrecer, que vaigamos perder otros dos años”.

IX, recordó Argüelles ellaboró una axenda de trabayu que yá presentó pal so desenvolvimientu a Podemos, y que les sos exes centrales enceten cuestiones como la probeza enerxética, reforzamientu de los servicios sociales o protección del medio ambiente. Esta axenda, reprochó'l coordinador xeneral d'IX Asturies, tendría de ser impulsada pol mesmu Gobiernu. Tres estos 24 meses de impás, y énte la falta de voluntá demostrada nesti tiempu pol executivu autónomu, el coordinador anunció un nuevu marcu nel que, añedió, “vamos ser nós quien forcemos, colos nuesos aliaos Podemos, na Xunta, de 14 a 14, esto ye, 9 de Podemos, 5 d'IX, al PSOE a xirar la estratexa”.

Si esiste voluntá de negociación, añedió Argüelles, en septiembre va haber la oportunidá de demostrase col entamu del nuevu cursu políticu, con un xiru a la izquierda del Gobiernu, y non, llamentó, “como fixeron hasta agora, que foi apautar la fiscalidá cola derecha por que pague menos quien más tien.