Menu

Ramón Argüelles refuga que se formara un frente contra'l Gobiernu y convida al PSOE a demostrar que ta dispuestu al cambéu sofitando en setiembre reformes lexislatives

IX y Podemos cerraron güei la so primer xunta pa la puesta en marcha d'una axenda lexislativa col compromisu d'impulsar un cambéu lexislativu en materia social. Dambes formaciones acoldaron xunir esfuerzos pa sacar una llei d'emerxencia social, aprovechando'l testu de Podemos –yá na Xunta Xeneral- que la formación denomina Llei d'Emerxencia Ciudadana pero que, más allá de la denominación, puede sirvir como vía pa esa meyora nes prestaciones a la ciudadanía más desfavorecida. El coordinador xeneral d'IX, Ramón Argüelles, amosó, tres esi alcuentru lo que nomó “optimismu realista”, nel convencimiento de que ye posible “camudar l'axenda política asturiana” dexando ensin conteníu'l discursu del presidente Javier Fernández de que la izquierda nun s'entiende. Ello ye que esplicó'l máximu responsable d'IX, el sofitu a la llei de Podemos inscríbese nesi nuevu marcu d'entendimientu y como un mediu pa evitar allongar procedimientos anque, eso sí, incluyendo amás la visión d'Izquierda Xunida.

Una axilización na tramitación del Salariu Social o la llucha contra la probeza enerxética formen parte de les prioridaes que, a xuiciu d'IX, tienen de formar parte del cambéu lexislativu y que tamién comparte Podemos.

A lo llargo d'agostu, esplicó Argüelles equipos d'IX “van trabayar de la mano” con Podemos por qu'en septiembre empiecen a materializase los alcuerdos, aprovechando la so llei, pa poder da-y forma nel Parlamentu. “Ilusionaos y, como dicía antes d'entrar, espero qu'esos dos años que se perdieron agora nun se pierdan, sinón que podamos recuperar lo más aína esto”, resumió'l coordinador xeneral d'IX Asturies.

L'entendimientu con Podemos nun se plantega de forma frentista. Otra manera, señaló Argüelles, “convidamos al Partíu Socialista a faer daqué que nun ta faciendo, que tenía que faer, que son esti tipu d'axendes y esti tipu de midíes, que sofite esta llei en septiembre”. Asina, aportunó en que l'únicu oxetivu ye que la sociedá asturiana ardíciese y pa eso ye necesario romper cola idega repitida de forma insistente por Javier Fernández al respective de que la izquierda nun se ponía d'alcuerdu. “A lo menos esta izquierda -dixo- va ponese d'alcuerdu, vamos ver si podemos cuntar col so sofitu (en referencia al PSOE)”.

Sicasí, al respective de les llamaes al diálogu del PSOE, Ramón Argüelles dixo que “el Gobiernu rexonal mandó una carta a los Reis Magos y n'IX nun lo creemos porque llevamos siendo defraudaos demientres dos años. Esto ye, esti señor ye presidente porque IX lu invistió presidente en cuenta de una axenda de cambeos, pero d'esos cambeos nun se produció nengunu”.

Pa IX, el Gobiernu socialista tien de demostrar si, de verdá, quier xirar a la izquierda daqué que se va ver si, finalmente, sofita les iniciatives que van entrar na Xunta a partir de setiembre. “Nun quiero que s'entienda que ye un frente énte'l Gobiernu; IX a lo menos nun vien con esa intención. Lo que se trata ye de crear una alternativa pola izquierda”.

Amás del cambéu lexislativu en materia social, nesti primer alcuentru Podemos, según Argüelles, punxo sobre la mesa cuestiones de rexeneración democrática, como la llimitación de mandatos o l'impulsu a la oficialidá de la Llingua, materies nes qu'esiste una gran coincidencia con IX.

Respectu al entendimientu de dambes fuerces, el coordinador xeneral d'IX esplicó que la clave pa resolver los desencuentros va ser la llealtá y la negociación”