Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

08/08/2017

Izquierda Xunida aboga pola prohibición del maltratu y la tortura nes corríes de toros n'Asturies

L'Área de Protección Animal d'IX Asturies llama a participar na manifestación contra la tortura animal convocada por ANADEL el 13 d'agostu en Xixón/Xixón.

El Secretariu d'Ellaboración, Programa y Participación d'IX Asturies, Javier Suárez Llana, adelantra que la formación va treslladar a la Xunta Xeneral “la necesidá de modificar la Llei de Tenencia, Protección y Derechos de los Animales de manera que se prohiban el maltratu y la tortura animal en tolos espectáculos”.
 
Izquierda Xunida d'Asturies considera que ye'l momentu d'avanzar nes polítiques de protección y bienestar animal, y en concretu, n'aspeutos como la erradicación del maltratu y la tortura animal acomuñada a espectáculos como les corríes de toros o los circos. El Secretariu d'Ellaboración, Programa y Participación, Javier Suárez Llana, considera que “ye ética y moralmente indefendible basar un espectáculu nel maltratu animal, y por eso'l Grupu Parlamentariu d'Izquierda Xunida, cola participación de la Área de Protección Animal, va treslladar nel próximu períodu de sesiones de la Xunta Xeneral la necesidá de modificar la Llei de Tenencia, Protección y Derechos de los Animales de manera que se prohiban el maltratu y la tortura animal en tolos espectáculos na nuesa Comunidá Autónoma”.
 
Para Suárez Llana, “esperiencies como la de Baleares, que'l so Parlamentu acaba d'aprobar una Llei qu'introduz restricciones nes corríes de toros, como la prohibición de mancar a los animales de nenguna manera, demuestra que ye posible avanzar nesta materia a pesar de la sentencia del Tribunal Constitucional qu'anuló la prohibición de les corríes de toros en Catalunya. Hasta que consigamos derogar la normativa estatal que declara la tauromaquia como Patrimoniu Cultural, n'Asturies tenemos d'avanzar, colos preseos normativos que nos son propios, na erradicación de la violencia escontra los animales mal acomuñada al ociu y la diversión o a la cultura y la tradición”.
 
IX quier aprovechar tamién la reforma de la Llei asturiana pa introducir cambeos n'aspeutos rellacionaos cola tenencia, la vienta y el tráficu d'animales, la protección de la fauna autóctona montesa y les especies migratories, el tratu a los animales n'esplotaciones agrícoles, ganaderes, núcleos zoolóxicos o los usaos n'esperimentación, y l'endurecimientu de les sanciones por incumplimientu de la normativa de protección animal.
 
Per otra parte, la Área de Protección Animal d'IX d'Asturies fai un llamamientu a la ciudadanía para participar viviegamente na manifestación contra la tortura animal convocada por ANADEL, que se va desenvolver en Xixón el próximu 13 d'agostu coincidiendo cola Feria Taurina de Begoña. La manifestación va salir de la Plazuela  San Miguel a les 16.30 hores. L'Área va participar na convocatoria con pancarta propia y va desenvolver una campaña en redes sociales los díes previos sol lema “Stop Maltratu Animal”.

 

Volver

Compartir

2014 Izquierda Xunida d'Asturies - Política de privacidad - Política de cookies