Menu

Marta Pulgar sorraya la necesidá d'aplicar les midíes incluyíes para la meyora directa del serviciu al ciudadanu

La diputada d'IX responsable de Sanidá, Marta Pulgar, como yá adelantró'l pasáu mes de xunetu, votó esta mañana a favor del dictame de la Comisión de Llistes d'Espera, qu'inclúi una gran parte de les 35 enmiendes formulaes pola coalición, coles mires de que “estes midíes que s'inclúin nel mesmu constituyan un impulsu para la so aplicación na sanidá asturiana”. La diputada recordó que, dende un entamu, IX tuvo claro que'l trabayu a realizar na mesma, amás de buscar responsables de l'ausencia de datos sobro llistes d'espera, consistía principalmente en buscar propuestes de meyora, proponer midíes clares qu'afecten directamente al ciudadanu y apurran soluciones globales y sosteníes nel tiempu.

A xuiciu de la diputada d'IX, la coalición apuesta por cambeos estructurales nel modelu sanitariu, cola definición estratéxica de midíes d'un plan contra les llistes d'espera dende'l puntu de vista estructural, non solo de midíes puntuales que son ineficaces a la llongura del tiempu. Pa Pulgar ye importante trabayar en potenciar l'atención primaria, n'ameyorar la coordinación de los distintos niveles asistenciales, n'ameyorar les condiciones llaborales de los emplegaos públicos pa dar calidá y estabilidá a los sanitarios, que son fundamentales nel sistema, y pola meyora de la participación ciudadana al traviés del dispositivu de control de les llistes d'espera. “Creemos que va suponer un cambéu nes llistes dende una perspectiva global y sostenío nel tiempu”, esplicó al términu de la comisión. El dictame, que cuntó colos votos a favor de tolos grupos sacante'l PSOE, va ser alzáu a plenu a principios del mes d'ochobre.

El dictame aprobáu güei establez dos bloques de responsabilidaes al respective de les llistes d'espera. El primeru d'ellos refierse al periodu de xunu de 2014 a ochobre de 2015 nel que nun se publicaran les llistes d'espera pa consultes y pruebes diagnóstiques. El Conseyeru Faustino Blanco y el xerente del Sespa, Tácito Suárez, son, a xuiciu de los diputaos los máximos responsables políticos de nun publicar “unos datos que nun yeren favorables al Gobiernu y non por motivos técnicos como argumentaron”, rellata'l dictame. El segundu d'ellos fai referencia a l'ausencia actual de datos referíos a les entraes en rexistru, los tiempos d'espera real o espera media de los pacientes atendíos nun periodu de les llistes de consultes y procedimientos diagnósticos y terapéuticos, nin la demoranza media prospectiva. La responsabilidá, nesti casu, de “los incumplimientos ya irregularidaes en materia de tresparencia” ye del actual Conseyeru Francisco del bustu y del xerente del Sespa, José Ramón Riera, añedida a la de la incorrecta xestión de les derivaciones quirúrxiques que nel casu de refugos, podría llevar a la perda de la prioridá na llista.