Menu

El grupu parlamentariu compromete’l so sofitu a una declaración institucional

Ovidio Zapico, diputáu d'IX na Xunta Xeneral, confirmó esta mañana a los secretarios xenerales de les Federaciones de Pensionistes de CCOO y UXT, colos que s'axuntó nel Parlamentu autonómicu, el sofitu d'IX a les marches poles pensiones dignes que van salir de Xixón esti mesmu sábadu y van confluyir en Madrid el 9 d'ochobre. El diputáu adelantró tamién la so presencia'l sábadu en Xixón hasta Pola de Siero, al pie d’otros miembros de la organización, y comprometió’l sofitu d'IX a una declaración institucional poles pensiones dignes na Xunta Xeneral del Principáu.

Los sindicatos empecipien una campaña de sofitu y defensa del sistema públicu de pensiones que foi y tien de siguir siendo garante de cohesión y de protección social frente al incesante cuestionamientu al que ta siendo sometíu. Dende'l movimientu sindical denuncien qu'esta tesis de la supuesta “inevitable inviabilidá” del sistema tán basaes na voluntá de caltener les equivocaes polítiques d'austeridá a estazón, y na ufierta de sistemes privaos de pensiones, resalvando que nun son, de nenguna manera, capaces de protexer meyor a la población pensionista.

De la mesma, los sindicatos y les organizaciones que la sofiten, recuerden que'l sistema públicu de pensiones favorez la cohesión social y respétense los derechos construyíos a lo llargo de la vida llaboral, al pie de midíes efectives de redistribución de la riqueza que garanticen pensiones abondes en tolos casos.