Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

29/09/2017

Ángela Vallina y el presidente de l'Academia de la Llingua alcuerden entamar en Bruxeles una xornada para la promoción del asturianu

La xornada, que se preve pal primer trimestre de 2018, pretende dar a conocer la situación de la Llingua y reivindicar la oficialidá

La llingua va dar el saltu pa proyectase más allá d'Asturies, aprovechando'l Parlamentu Européu. La eurodiputada Ángela Vallina y el presidente de l'Academia de la Llingua Asturiana (ALLA), Xosé Antón González Riañu, axuntáronse esta mañana na see de la institución para establecer mecanismos de collaboración que dexen espublizar la realidá del idioma asturianu dientro y fora de la rexón, nun procesu, amás, de reivindicación de la oficialidá. El primer compromisu foi realizar una xornada en Bruxeles nes que se va encetar la situación, realidá y necesidaes del asturianu, aprovechando, amás, la esistencia d'un intergrupo de llingües minoritaries.

Ángela Vallina, que recordó que pa Izquierda Xunida la llingua formaba parte de les sos señes d'identidá, comprometiose a impulsar, pal primer trimestre de 2018 un actu públicu y divulgativu en Bruxeles. “Hai un interés creciente dientro de lo que ye la Unión Europea, dientro del Parlamentu, coles llingües minoritaries de los países. Creo que ye'l momentu oportunu, como falemos, de dar un tirón y una repercusión que sala más allá d'Asturies a les nueses reivindicaciones sobro la nuesa cultura y sobremanera sobro la nuesa Llingua”.

Xosé Antón González Riañu esplicó que l'Academia ta teniendo xuntes colos distintos axentes sociales d'Asturies, grupos parlamentarios y sindicatos, pa percanciar el mayor de los consensos y sofitos na potenciación del asturianu. “Interesábanos enforma conectar colos cuatro europarlamentarios, nesti casu, la primer xunta foi con Ángela Vallina, d'IX, y ende falábamos de cómo podíamos collaborar, de cómo podíamos dar a conocer nel contestu européu la llingua asturiana”.

L'alcuentru, a xuiciu de González Riañu, foi granible: “salieron idees bien interesantes; salió por casu la posibilidá de faer un actu nel Parlamentu européu nel que se dea a conocer cuál ye la realidá y les necesidaes de la llingua asturiana. Esto vamos llevalo adelantre y vase a faer nel primer trimestre de 2018 y, dende l'Academia consideramos que va ser un finxu más na visualización y la promoción de la llingua asturiana nel contestu européu”.

Ángela Vallina amosóse confiada en que l'actu conviértase nun primer pasu de más actividaes que sirvan pala promoción del asturianu na reivindicación de la so oficialidá.

Volver

Compartir

2014 Izquierda Xunida d'Asturies - Política de privacidad - Política de cookies