Menu

Ovidio Zapico recuerda que l'Asturies Central presenta'l peor índiz de toa España de contaminación por partícules sedimentables.

IX va esixir esta selmana nueves midíes anticontaminación para la Zona Oeste de Xixón, una vegada que'l Principáu reconoció'l problema, y sacar a l'Asturies central del ranking que l’asitia col peor índiz en materia de PM10 de tol conxuntu del estáu, según los datos del Estudiu de Calidá del Aire 2016 publicáu pol Ministeriu de Medioambiente la selmana pasada.

A xuiciu d'IX, la Conseyería d'Infraestructures y Medioambiente tien de llevar a cabu midíes concretes ente les que figuren: la revisión de les Autorizaciones Ambientales integraes de les empreses más contaminantes p'amenorgar les llendes d'emisión, alcordando delles midíes, inversiones y calendarios d'aplicación; la revisión tamién de los planes calidable del Aire de Xixón, que magar ser aprobáu n'agostu riquen más acciones, ente elles midíes pa cubrir los graneles de minerales avolumaos que se remanen n'El Musel; aumentar la dotación d'estaciones mididores de la rede pública, porque la del Conceyu de Xixón demostró los problemes contaminación frente a datos del Principáu. IX tamién propón destinar más recursos a vixilancia medioambiental, amontando'l númberu d'inspecciones y el de personal. Zapico sofitó esta postrera aseveración na respuesta que la mesma Conseyería ufiertó al grupu parlamentariu por escritu ayeri mesmu na qu'asegura “dada la medría de carga de trabayu dende la so puesta en marcha hai daqué más de dos años ta trabayándose n'amontar los medios disponibles pa poder establecer oxetivos ambiciosos nel próximu Plan d'Inspección Ambiental del Principáu pal periodu 2018-2020”.

El diputáu d'IX apuntó trés midíes más incluyíes na moción subsiguiente que se va aldericar este mesmu vienres, pa la qu'espera unanimidá: establecer como prioridá la ellaboración del nuevu Plan de Movilidá de l’Área Metropolitana Central d'Asturies, la presentación antes de la finalización del actual periodu de sesiones del proyectu de Llei de Sostenibilidá y Protección Ambiental y l'alcuerdu colos conceyos de fórmules y preseos que dexen xuna mayor participación de los mesmos nos planes de meyora de la calidá del aire.

Los últimos datos conocíos sobro contaminación confirmen a xuiciu del diputáu la necesidá d'establecer midíes. Nel informe que'l Ministeriu de Medioambiente publicó la selmana pasada asitia a l'Asturies central En relación a la PM10, les partícules sedimentables, como l'únicu llugar onde'l valor llende añal superóse y nel valor llende diariu, al pie de Plana de Vic y a Villanueva del Arzobispu, vuelve apaecer l'Asturies central a la cabeza, teniendo en cuenta que tán descontaes les aportaciones d'aire subsahariano. “L'Asturies central tien el peor índiz en materia de PM10 de tol conxuntu del estáu pero si apruébense midíes como les qu'apurrimos vamos tar na dirección fayadiza por qu'Asturies dexe d'apaecer nel informe calidable del aire colos peores datos en PM10”, concluyó'l diputáu d'IX.