Menu

Argüelles anuncia que la formación apuesta pola aprobación no que queda de llexislatura de la nueva Llei de Mocedá

Concha Masa enfatiza na necesidá d'una normativa que dexe dar respuesta en vivienda para favorecer la emancipación

Sheyla Suárez reprocha qu'Asturies sía una de les poques comunidaes qu'entá nun tien lexislación específica en mocedá

Izquierda Xunida va sofitar y va impulsar la creación d'una “mesa pol emplegu de los mozos” qu'encete la situación del colectivu na materia y na que s'incorporen representantes sindicales, patronal, conceyos, organizaciones xuveniles y el mesmu Gobiernu. El coordinador xeneral d’IX Asturies, Ramón Argüelles, aprofió qu'esta iniciativa, propuesta pol Conseyu de la Mocedá d'Asturies (CMPA), tien que sirvir como una ferramienta para dar respuesta a la grave situación de paru qu'afecta a la población xuvenil asturiana.

Argüelles axuntóse güei cola presidenta del CMPA, Sheyla Suárez, al pie de la diputada autonómica Concha Masa, la secretaria de Movimientos Sociales y el secretariu d'Árees d'IX, Mayka Barros y Javier Suárez Llana, pa encetar la nueva Llei de Mocedá, anguaño en fase d'anteproyectu. Tratase d'una nueva normativa que, adelantró'l coordinador xeneral, “va cuntar el sofitu del grupu parlamentariu d'IX”. Y ye que, l'aprobación de polítiques específiques palos menores de 35 años ye daqué fundamental a xuiciu d'Argüelles, quien recordó dellos datos qu'evidencia esta necesidá. “La vivienda y l'emplegu igual hai que tratalos con más fondura. Como datu, dicir que la emancipación n'Asturies ye del 18%, de les más baxes d'España y esos dos problemes, tantu la vivienda como l'emplegu daqué van tener que ver n'eso”.

Nesta situación, la convocatoria d'una mesa pol emplegu, esplicó Argüelles, tien de dexar la participación de sindicatos, FADE, FAC, Conseyos de Mocedá, y el mesmu Gobiernu. “El desemplegu ye unu de los mayores problemes que tienen los nuesos mozos y tenemos qu'intentar lluchar pa erradicalos”.

La Llei de Mocedá, esplicó la diputada Concha Masa, tien que ser una prioridá, cuidao que Asturies escarez d'una regulación autonómica propia. “Unu de los aspeutos que más nos esmolez y que taría contempláu nesta llei ye'l de la vivienda xuvenil, que ye una gran defectu qu'hai na nuesa Comunidá”.

La presidenta del Conseyu, Sheyla Suárez, enfatizó na importancia d'entainar l'aprobación d'una nueva Llei de Participación y Promoción Xuvenil que, xuntu con midíes específiques en vivienda y empléu, tienen de dexar ameyorar la estabilidá de los mozos de la rexón, poniendo fin a la sangría” que fixo qu'Asturies sía la rexón europea con menos persones menores de 30 años. Nesti sentíu, fizo un llamamientu por que pueda sacase alantre la nueva lexislación col máximu consensu. “Creemos que ye yá hora de que tengamos una Llei de Mocedá nel Principáu d'Asturies, yá que ye una de les comunidaes que ta ensin elles”.

“Tanto'l Gobiernu rexonal como los grupos de la Xunta tendríen de tomar mayor esmolición: dacuando notamos esa falta d'esmolición pola mocedá na Xunta Xeneral del Principáu. Por eso, estimamos güei a Concha (Masa) tamién que güei tea equí”