Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

Vallina: La causa principal de les quemes ye la pésima xestión del territoriu, anque quieran faer creer que nun hai responsables políticos

La eurodiputada d'IX denuncia l'abandonu de los montes n'Asturies, onde se producieron 96 quemes, resultando afectaos más de la metá de los conceyos del Principáu.

Denuncia les condiciones de precariedá llaboral de los brigadistes, la falta d'efectivos del cuerpu de bomberos y una política de reforestación basada nel ocalitu.

La eurodiputada d'Izquierda Xunida Ángela Vallina denunció anueche nun alderique mientres el plenu que se celebra esta selmana n'Estrasburgo que les quemes qu'afectaron a 41 de los 78 conceyos asturianos la pasada selmana son frutu de la pésima xestión del territoriu y l'abandonu de los montes, lo qu'indica que, magar lo que quier tresmitise dende'l Gobiernu del Principáu y dende el Gobiernu del Estáu español, esiste una responsabilidá política detrás d'ello.

"N'Asturies sufrimos 96 quemes en 41 conceyos, de los 78 que tenemos y pretenden faenos creer que nun hai responsabilidá política. Nun hai dulda de que dalgunos seríen provocaos yá sía por intención o por irresponsabilidá, pero la causa principal de lo qu'asocedió ye la pésima xestión del territoriu", espresó Vallina na so intervención.

Xestión que se traduz n'una desatención total "de la llimpieza de los montes" y "n'especial de les franxes cortafueos", de resultes de "l'aplicación d'unes polítiques llaborales inaceptables a les brigaes d'estinción de quemes", a les que se-yos apliquen "contratos temporales intermitentes, en llugar de crear places públiques estables". Estes, añedió, "son les consecuencies de los retayos del gastu públicu".

La eurodiputada criticó que "nin siquier la mesma xente de mediu rural" pueda “entrar a llimpiar los montes, pola aplicación de les Normes Subsidiaries nos Parques Naturales". Y claro, énte l'ausencia de bomberos, "lo que se fai ye unviar al Exércitu y a la Policía".

La causa, siguió Vallina, ta tamién nes polítiques de la Unión Europea, "que provocaron la despoblación de les zones rurales y l'abandonu del campu y de los montes", y nuna aplicación de la Política Agraria Común que ta dexando que s'empleguen partíes pa reforestar zones afectaes por quemes con especies como'l ecualiptu, qu'amás de ser una especie invasora que pon en riesgu a les especies autóctones, ye una planta de bona combustión.

"Y por si esto fuera poco, tenemos abierta una investigación n'Asturies por malversación de fondos FEADER, que tendríen de ser emplegaos en reforestaciones. ¡Menos ocalitos y más monte autóctonu!", reclamó.

Vallina terminó la so intervención recordando la responsabilidá de la UE en combatir los efectos del cambéu climáticu, "que debería d'implicar más que nunca una fayadiza xestión de los medios públicos".

Volver

Compartir

2014 Izquierda Xunida d'Asturies - Política de privacidad - Política de cookies