Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

Argüelles caltién la ufierta de diálogu pero alvierte que nun sofitará un presupuestu de dereches

El coordinador xeneral d'IX defende la necesidá d'unes cuentes de cambéu para 2018 sofitaes en gastu social, emplegu, recuperación del mediu ambiente y apueste pol asturianu

El coordinador xeneral d’IX Asturies, Ramón Argüelles, defendió güei la necesidá d'un presupuestu pa 2018 que se sofite en cuatro pates: gastu social, recursos pa xenerar empléu, recuperación del mediu ambiente y apueste pol asturianu. Argüelles llamentó la poca “receptividá” manifestada polos socialistes na última xunta negociadora, magar esplicó qu'IX va caltener hasta'l final la ufierta de diálogu. Eso sí, alvirtió'l máximu responsable de la organización énte un posible intentu de reeditar les cuentes del últimu exerciciu posibles gracies al sofitu de la derecha, los alcuerdos namái van ser posible si les cuentes pa 2018 son progresistes, de cambéu, d'izquierda: “IX nun va prorrogar el presupuestu aprobáu pol Partíu Popular. Eso tienlo claro”. Y ye que, repostió'l dirixente d'Izquierda Xunida, “una cosa ye ser flexible y otra entregase”.

“Vamos axustar hasta l'últimu momentu pero tamién nos gustaría que la parte opuesta tuviera cierta sensibilidá coles proposiciones que nós faemos”, señaló Argüelles pa quien la flexibilidá tien de ser cosa de toles partes de la negociación. “Axustar significa renunciar, pidir diez y coyer cinco, pero, lo que nun puede ser ye que coyamos los cinco del PSOE y que'l PSOE nun coxa nengunu de los nuesos. Pa siguir col mesmu presupuestu qu'hai agora, l'actual, pa eso nun nos precisa”.

Al respective de la fiscalidá'l coordinador xeneral d'IX plantegó la necesidá de llograr ingresos: “Nun blindamos la tema de los impuestos puramente a los que diz Izquierda Xunida, pero tien qu'haber un cambéu, tien qu'haber mayores recursos pa poder apautar política social. Tien d'habelos”.

Volver

Compartir

2014 Izquierda Xunida d'Asturies - Política de privacidad - Política de cookies