Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

05/12/2017

Masa reclama a Educación una execución axilosa y eficaz de les partíes presupuestaries

La diputada d'IX considera positives les cifres presentar anque ameyorable

Amuesa la so esmolición pola situación del IES de La Corredoria, el compromisu pocu valiente cola etapa cero a trés años y la non reversión de los retayos al profesoráu

Concha Masa, la diputada d'IX responsable d'Educación, Cultura y Deporte, aportunó nel interés d'IX d'aprobar los presupuestos presentaos pol executivu de Javier Fernández que, anque ameyorables, considera positivos. Sicasí, repitió la necesidá d'executar al máximu les partíes y llevar a cabu una xestión de Gobiernu axilosu y eficaz que dexe rentabilizar cada partida.

Masa esplicó l'oxetivu de consiguir un cambéu d'izquierdes, cumpliendo col mandatu de les urnes y amosóse dispuesta a dialogar y axustar hasta l'últimu momentu, porque una prórroga presupuestaria sobro la base de los presupuestos aprobaos xuntu al PP sería la peor opción, máxime cuando s'aprecien delles medríes en determinaes árees.

La diputada d'IX reconoció meyores nel financiamientu de la etapa cero a trés años, anque IX siga apostando pola universalización de la ufierta, que forma parte de les prioridaes d'IX y asina lo afitaba nel alcuerdu d'investidura. Esi aumentu, que nomó de notable, la diputada d'IX esplicó que nun ye casual y débese a la movilización na cai, la plataforma de trabayadores y al trabayu d'IX. Sicasí, Masa llamentó'l compromisu pocu valiente” ensin marcar unos oxetivos bien definíos. “Esmoleznos la indefinición de la Conseyería, alvirtió, dempués de quexase pol estudiu “escondíu” sobro esta etapa que caltien el departamentu d'Educación. “L'aumentu de dos millones ye notable pero nin de llueñe abondu pa universalización y la gratuidá. Ye más la gratuidá nun esiste. Tolos servicios públicos tienen un costu y non pequenu. O lo paguen los usuarios directamente o al traviés d'impuestos, pero mientres s'amenorguen los impuestos nun pueden pidise tolos servicios gratis”, esplicó la diputada.

Masa tamién se pronunció al respective de la convocatoria d'oposiciones, que ve “con prestu en secundaria”, pero alvirtió de la esmolición que xenera la situación del profesoráu que nun ve la salida de la crisis. “Ésti vio amenorgáu'l sueldu, aumentáu'l númberu d'hores de trabayu, la precariedá llaboral, l'aumentu profesores a media xornada ya itinerantes y nun se contempla dir avanzando nin amenorgando toes estes cuestiones”, aseguró.

N'infraestructures educatives ye entá insuficiente l'esfuerzu realizáu, a xuiciu de la diputada. Na so fixación de posición destacó con esmolición la situación del IES de La Corredoria. “Nun pueden siguir pasándose la pelota ente'l Conceyu y la Conseyería, ensin siquier, ufiertar soluciones temporales.

Masa tamién reclamó la presencia de la llingua na RTPA que, anque ye ciertu qu'aumenta 70.000 euros, esti dineru va ser dedicáu al doblaxe de llargumetraxes y programes infantiles. “La llingua, eternamente escaecida, tendría de tar presente tamién nos informativos”, clamó. De la mesma, pidió xuna “ actitú más dialogante” de la Conseyería cola Academia de la Llingua y la Xunta Pola Defensa de la Llingua.

En Deportes llamentó qu'esti alcuéntrase “abondo mal atendíu, sobremanera les ayudes al deporte base que son escases y l'apueste claru pola promoción del deporte femenín”.

Volver

Compartir

2014 Izquierda Xunida d'Asturies - Política de privacidad - Política de cookies