Menu

La eurodiputada d'IX recuerda que la UE tien entá enforma trabayu per delantre nestos dos asuntos, reclama la ratificación del Conveniu d'Istambul per parte de tolos Estaos miembros y una campaña efectiva que lluche contra l'acosu que sufren les persones LGTBI.

Alvierte que ye una cuestión de voluntá política y qu'ensin unu financiamientu afayadizu y el sofitu de les instituciones, ye imposible poneles en marcha.

La eurodiputada d'Izquierda Xunida Ángela Vallina esixó anueche n'Estrasburgo que la Comisión Europea dea pasos decidíos na llucha contra la violencia de xéneru y la discriminación contra les muyeres y les persones LGTBI. Mientres un alderique sobro l'Informe de Ciudadanía Europea 2017, que se vota güei, la parllamentaria revindicó la necesidá d'enllantar polítiques de xéneru y programes de concienciación y educación, financiaos públicamente y sofitaos dende les instituciones p'atayar estos dos graves problemes.

“Dende la comisión de Derechos de la Muyer ya Igualdá de Xéneru venimos reclamando a los Estaos miembros y a les instituciones europees, cuantimás a la Comisión, qu'adopten midíes integrales contra la discriminación de les muyeres”, señaló Vallina mientres la so intervención.

La eurodiputada refirióse, por casu, a “la Directiva contra la discriminación”, que lleva paralizada dende hai yá casi una década, pero tamién al Conveniu d'Istambul contra la violencia de xéneru, “que tendría de ser ratificáu por tolos Estaos miembros” y a les propuestes que dende FEMM llanzáronse en materia de “llucha contra la discriminación de les persones LGTBI y, sobremanera, no que se refier al acosu y la intimidación que sufren nes redes sociales”.

La Comisión Europea, añedió Vallina, “tien de faer casu a la nuesa demanda pa l'adopción de polítiques de xéneru en tola Unión”. A última hora, débense “potenciar programes d'educación cívica calidable, qu'enceten los prexuicios, la discriminación, y trabayar en campañes que ruempan los estereotipos de xéneru”.

“Repitir estes demandes –cerró Vallina-: ensin voluntá política, ensin financiamientu y ensin una alministración fuerte, nun esiste nin estáu de derechu, nin estáu de bienestar”.