Menu

Izquierda Xunida esixó güei soluciones que garanticen el futuru de la Mancomunidá del Cabu Peñes y reclamó la dimisión de l'alcaldesa de Carreño, Amelia Fernández, pola so negativa a asumir la presidencia de la entidá, poniendo en riesgu la so continuidá y la de los servicios a vecinos y vecines de Carreño y Gozón, como la piscina d’Antromero.

El coordinador xeneral d'IX, Ramón Argüelles, defendió güei la necesidá de buscar víes que desbloquien d'una vegada la xestión yá que, aseguró, mancomunidaes como ésta tienen claros beneficios pa=la ciudadanía.

El voceru d'IX en Carreño, Ángel Vega, foi especialmente críticu cola rexidora del so conceyu a la qu'acusó de ser la responsable de l'actual crisis, na que se ta torgando una adaptación de los estatutos a les nueves esixencies llegales, poniendo en riesgu una entidá con más de dos décades de probáu ésitu. "La Mancomunidá del Cabu Peñes ye de Carreño y de Gozón, non de Carreño contra Gozón. Y esa situación de poner un conceyu contra otru conceyu, que surda del Conceyu de Carreño y que surda de l'Alcaldesa Amelia Fernández, a nós como miembros d'esa Corporación, enllénanos de vergüenza". Ello ye que la mayoría de los grupos d'esi conceyu, añedió'l conceyal, tán en contra d'esa posición. "L'Alcaldía nun fala en nome de Carreño", esplicó'l conceyal quien, énte esta situación, demandó amás al restu de grupos la reprobación de tol equipu de Gobiernu del PSOE por dar respaldu a esa decisión unillateral y dar el llombu a lo qu'esixen el restu de fuerces.

Pela so parte, el conceyal d'IX en Gozón, César Fidalgo, refugó los argumentos remanaos por Amelia Fernández pa negase a asumir la presidencia yá que, dixo, "cain por sí solos", no que al so xuiciu ye un alderique falsu que solo crea tracamundiu nos vecinos.

La secretaria de Política Municipal d'IX, Gabriela Álvarez, esplicó que la so formación treslladó tamién la situación a la Federación Socialista Asturiana (FSA) coles mires de buscar dalguna solución, al tratase d'una cuestión qu'afecta a dos conceyos y con un claru impactu pala población. Álvarez enfatizó la necesidá d'algamar un alcuerdu que torgue que se pierdan casi 30 años d'una mancomunidá útil pa los vecinos. "Esperemos que se piense más nos vecinos de los dos conceyos y que nun sía la resultancia de lo que paez, que ye xuna crisis política abierta ente dos facciones distintes. Nun hai nengún argumentu por que nun pueda asumir la presidencia (en referencia a l'Alcaldesa de Carreño)".

La crisis pola que traviesa la Mancomunidá ye pa IX inesplicable, más porque siempres se llograra'l máximu consensu, con independencia de los distintos gobiernos municipales daos los beneficios claros que pa dambos conceyos reportaba.