Menu

El voceru d'IX amuésase críticu porque nun llograron la pretensión de mayor autonomía de los profesionales, la participación ciudadana y la meyora calidable nel serviciu

Gaspar Llamazares, voceru parlamentariu d'IX na Xunta Xeneral, demanda al Gobiernu la evaluación de les árees de xestión sanitaries cuando se cumple casi una década de l'aprobación de les mesmes. Ye'l momentu yá de revisar cómo funcionen y qué resultancies dieron, esplica'l voceru d'IX dempués de rexistrar una batería d'entrugues sobro l'asuntu. Pretendíase una mayor autonomía per parte de los profesionales, más participación de los ciudadanos y una meyora de la calidá de los servicios sanitarios, recuerda, que sicasí la impresión del grupu parlamentariu ye que se produció una mayor burocratización entá mayor de la organización y la xestión de los servicios sanitarios y un economicismu cada vez más rampante na xestión. “Tenemos una opinión crítica y creemos que tien qu'haber xuna evaluación y xuna reorientación de les árees de xestión clínica pa responder a la meyora de la calidá de los servicios y p'ameyorar la participación de profesionales y ciudadanos na xestión sanitaria”, alvierte Llamazares.

Nestos momentos puede dicise ensin riesgu a equivocar, diz Llamazares, que la xestión clínica ye un nuevu esperimentu fallíu de cambéu na xestión sanitaria. En concretu Llamazares entruga al Executivu asturianu: ¿Dende 2009 cuántes Unidaes y Árees de xestión clínica y proyectos de xestión compartida punxéronse en marcha per alcuerdu del Conseyu de Gobiernu o'l Conseyu d'Alministración del SESPA n'Asturies en caúna de les Árees, zones de salú ya instituciones sanitaries?; ¿cuál ye la situación actual de les mentaes Unidaes y Árees de xestión clínica constituyíes?; ¿cuántes y qué unidaes o árees de xestión se modificaron o suprimieron dende entós y por qué causes?; ¿cuántes y qué unidaes y árees de xestión clínica cunten con evaluaciones añales aprobaes o suspendíes dende la so constitución pola dirección xerencia del SESPA y nestos momentos?.

Tamién demanda información sobro ¿qué unidaes y árees de xestión clínica cunten con alcuerdu de xestión clínica y memoria añal a valir y cuálos non, detallando la situación de les mesmes?; ¿qué unidaes y Árees cunten con director/a, cuál foi la so forma de provisión y si siguen desempeñando funciones asistenciales o non, y cuálos tán vacantes nesti momentu y por qué razones?; ¿fixo'l gobiernu la evaluación global del nuevu modelu de xestión clínica al cabu de casi nueve años de funcionamientu y cuálos son les sos conclusiones nel cumplimientu de los oxetivos en materia d'atención sanitaria, atención comuñal y salú pública, rehabilitación, formación docencia ya investigación, lo mesmo que de los oxetivos d'atención integral al paciente, descentralización y autonomía, conciliación de l'actividá clínica y la xestora y de los oxetivos de resultancies clíniques, económicos y d'información?; ¿con qué presupuestu adicional cuntó y qué aforros llogró'l modelu de xestión clínica a lo llargo d'estos años y cómo se distribuyó tantu n'aforru como en materia d'incentivos acomuñaos al cumplimientu de los alcuerdos de xestión en caúna de les árees sanitaries, los centros y les unidaes y árees de xestión clínica, y qué evaluación coste efectividá fai de los mesmos?.

D'últimes pregunta: ¿tien previstu'l gobiernu dar per rematada la esperiencia de les unidaes y árees de xestión clínica a tenor del so paralís actual o piensa abrir un procesu de participación política, social y profesional empuestu a la reconsideración y reorientación del conxuntu del modelu por que esti sía de verdá participáu por pacientes y profesionales, congestionado y descentralizáu, favorecedor de la integralidad y la continuidá de l'atención y la meyora de la calidá y l'usu de los recursos?.