Menu

IX va caltener la presión pa evitar que los conceyos tengan que devolver fondos si'l Principáu abre espedientes de reintegru

El coordinador xeneral d’IX Asturies, Ramón Argüelles, valoró güei bien positivamente la unidá d'acción de los distintos conceyos afectaos polos Planes d'Emplegu que, alcordaron la presentación d'allegamientos iguales contra l'apertura d'espedientes de reintegru qu'embaraxa'l Principáu d'Asturies. “Allegrámonos de qu'haya unanimidá na respuesta. Eso fai más fuerte la reivindicación”, aseveró el máximu responsable de la formación.

Argüelles recordó que los Planes d'Emplegu fueron diseñaos pola mesma Alministración autonómica y los Conceyos fueron los sos executores. Sicasí, matizó, “en nengún casu pueden ser los perdedores d'esta xugada”.

El máximu responsable d'IX reivindicó la continuidá de los Planes d'Emplegu a futuru como una respuesta indispensable énte la situación xeneral d'Asturies. Eso sí, el caltenimientu tien de faese con un modelu que nun cause perxuicios a les alministraciones locales, evitando que los Conceyos sían los “paganinis” de la situación.

Pela so parte, la secretaria de Política Municipal, Gabriela Álvarez, aseguró qu'IX va caltener como una prioridá estratéxica llograr una solución que torgue que les arques municipales carguen con cualquier consecuencia por cuenta d’un diseñu desaparente de les convocatories de los Planes d'Empléu. Los Conceyos, esplicó Álvarez, nun pueden ser responsables d'unes convocatories que fixo'l mesmu Principáu, que ye l'alministración competente y la que tien la obligación d'asumir los sos propios erros.

Gabriela Álvarez señaló l'esfuerzu que se ta faciendo dende IX pa llograr atopar una vía de salida qu'evite que los Conceyos tengan que devolver una llínees de subvenciones que sí gastaron y que si agora tán en cuestión nun ye pola praxis municipal.