Menu

Ovidio Zapico oldea la gran cantidá de comida en bon estáu que se tira y les necesidaes sociales qu'esisten

La Xunta Xeneral encamienta, por unanimidá, al Gobiernu del Principáu a qu'ellabore, en collaboración cola alministración central, los conceyos y les entidaes sociales, y presente énte la Cámara primero que remate'l presente añu, un plan p'amenorgar al 50% el volume de desperdiciu d'alimentos n'Asturies que contenga, siquier, los siguientes aspeutos: 1.Programes pa impulsar el consumu responsable y el reciclaxe y reutilización de los alimentos nos llares y empreses d'Asturies. 2. Un plan alcordáu coles entidaes sociales que trabayen nel ámbitu de la intervención social qu'incluya midíes que faigan posible la esistencia de canales de recepción d'alimentos sobrantes en bon estáu, que puedan ser donaos poles superficies comerciales y establecimientos de restauración pa la so distribución ente persones en riesgu de probeza. 3. Midíes pal amenorgamientu del desperdiciu n'alimentos na Alministración autonómica y los servicios públicos. 4. Estudiu de les posibilidaes de reciclar los escedentes d'alimentos que nun puedan distribuyise ente persones en riesgu de probeza por que puedan destinase a otres finalidaes como'l consumu animal, la ellaboración d'abonos, etc…

Zapico, diputáu d'IX que defendió la Proposición Non de Llei d'IX, alvirtió qu'Asturies ta “faciendo poco” p'amenorgar el volume de desperdiciu d'alimentos en bon estáu, sabiendo lo gran cantidá que se tira y les necesidaes sociales qu'hai. El diputáu defendió la propuesta dende la perspectiva medioambiental de la xestión de borrafes y dende la óptica social. Los asturianos somos, dixo'l diputáu, los y les españoles que más gastamos n'alimentación, con casi 1.700 euros per persona y añu y mercamos más de 700 quilos de comida y que gran parte d'esos alimentos, en bones condiciones y susceptibles de ser aprovechaos, 63 quilos al añu desperdiciense. Tamién Asturies tien una tasa de riesgu de probeza del 13,5% y un 5% de llares con dificultaes pa llegar con cuenta a la fin del mes.

Les alministraciones públiques, más allá d'unes cuantes declaraciones d'intenciones, nun fueron capaces d'encarar el desafíu d'acabar con una paradoxa intolerable: tonelaes de comida en bon estáu siguen diendo parar a los vertideros de basura d'una sociedá na qu'hai persones que precisen de too.