Menu

El diputáu d'IX pide actuaciones cuanto antes

Ovidio Zapico, diputáu d'IX na Xunta Xeneral, considera que les actuaciones anunciaes pol Conseyeru d'Infraestructures, Fernando Lastra, pa Llastres dexen desilusión yá que, dempués de dos años, nun s'avanzó nuna propuesta concreta, y, al empar, cierta esperanza por ver la reorientación que la Conseyería dio. Na comparecencia a pidimientu d'IX sobro Llastres, en redol a l'accesibilidá, aparcamientos y movilidá, problemes qu'afecten yá dende va munchos años ya IX vien denunciando, el Conseyeru avanzó la creación d'un grupu de trabayu de trés direcciones xenerales de la Conseyería que s'axuntó una vegada, y volverá faelo nunos díes.

Anque'l Conseyeru valoró la construcción d'una Variante, como la de Cuideiru, el diputáu d'IX recordó que'l financiamientu d'ésta nun se va realizar nesta llexislatura. Lastra referíase a que van realizar un estudiu pa un plan de cooperación colos conceyos pa diseñar aparcamientos alloñaos de los núcleos de población, en llugares con posibilidaes d'espaciu, pa depués ver la posibilidá d'usar danzaderes, y tamién estudiar meyores d'accesu a les villes, non solo pa vehículos a motor, sinón tamién pa peatones y l'usu de bicicletes. Según el Conseyeru la posibilidá de construyir una Variante en Llastres nun ye fácil nin técnica nin económicamente, pero “probablemente nun haya más remediu”.

Zapico alvirtió de qu'IX nun va cayer nel encorsetamiento de cómo se va a llamar esi grupu d'actuaciones, anque la primer propuesta yera un plan director, que l'anterior Conseyera circunscribía a un plan piloto, y el Conseyeru agora lláma-yos conxuntu d'actuaciones. “Lo que queremos ye que se faiga y soluciónense los problemes que venimos denunciando”, alvirtió.

El diputáu d'IX tamién señaló que si les midíes pueden tar operatives nesti branu de 2018, “meyor que meyor”. Sí sabemos que llevamos más de dos años esperando por una respuesta satisfactoria del Gobiernu autonómicu pa los llastrinos y llastrines y que esa respuesta inda nun llegó y esperamos qu'esta reorientación, que recueye l'espíritu de la iniciativa d'IX, tocantes a aparcamientos, movilidá y accesibilidá pueda llevase a cabu y puedan vese, por fín, los sos efectos positivos a lo llargo del próximu branu, esplicó Zapico.

El diputáu d'IX, como yá reclamó va dos años cuando se produció la primer iniciativa parlamentaria sobre l'asuntu, apostó por una meyora de los accesos a Llastres, realizando una variante, pola de los accesos al puertu, utilizando autobuses lanzadera y pola meyora de los accesos al Muséu del Xurásicu o la sablera de La Griega. Pal diputáu estes meyores terminaríen “col galimatíes en que se convierte la villa pel branu”, col consiguiente perxuiciu pa los sos habitantes “afogaos” pol tráficu y los atascos.