Menu

El voceru d'IX sorraya que les midíes de Rajoy dexaríen ensin controlador al aeropuertu nel horariu nocherniegu

La entruga de Gaspar Llamazares nel plenu de la Xunta Xeneral motivó un cambéu de postura del Gobiernu asturianu al respective de l'aplicación d'un real decretu del Gobiernu de Mariano Rajoy que significaría que los vuelos d'emerxencies, ente ellos los de tresplantes, realizaríense ensin la presencia d'un controlador nel aeropuertu asturianu o la Organización Nacional de Tresplantes modificaría los sos horarios d'estracción y donación pa garantizar la seguridá del personal sanitario. Agora'l Gobiernu sostien nel Parlamentu que se va dirixir a AENA y l'Axencia De Seguridá Aérea información de garantía y seguridá de los vuelos y p'evitar que, en nengún casu pierda un solu donante y nengún vuelu d'urxencies.

Llamazares manifestó'l so deséu de que'l Gobiernu asturianu “nun llegue tarde” énte una midida aprobada por Real Decretu a finales de 2016 y que va significar que los vuelos d'emerxencies en 10 aeropuertos de siete comunidaes autónomes van funcionar pela nueche ensin un controlador como retén. La so repercusión ye, esplicó, en dos xoyes de la corona, la Organización Nacional de Tresplantes, y el turismu. Tres la midida, Llamazares repitió que s'escuende un criteriu economicista de AENA, el d'evitar que los yá escasos controladores dediquen hores a esti asuntu cuando se ta, amás, en víspores d'un nuevu colapsu nos aeropuertos frutu de que les hores de los controladores tán na llende y el tráficu aéreu empieza a repicar. El Real Decretu, dixo, supon “ vistir un santu pa desvistir otru”, polo qu'esixó respuesta per parte del Gobiernu.

Los aviones d'emerxencies quedaríen posiblemente conectaos a un sistema electrónicu a 50 kilómetros del aeropuertu y a 5.000 metros d'altitú y nun cuntaríen cola presencia d'un controlador na torre pal aterrizaxe. “Tratase de realizar vuelos a palpu”, aseveró Llamazares pa de siguío repitir la necesidá de paralizar esta midida.

Llamazares amosó la so esmolición pola respuesta de la Organización Nacional de Tresplantes na qu'asegura que si nun se cumplen les condiciones necesaries de seguridá podríen camudar el modelu de donación, treslláu ya implante de tresplantar p'afaer los sos horarios a los d'un aterrizaxe seguru.