Menu

María José Miranda, diputada d'IX responsable de los asuntos de Desenvolvimientu Rural y Recursos Naturales reclama'l cambéu del resolvimientu de la Conseyería qu'implica que solo apicultores que tengan más de 80 truébanos puedan acoyese a les ayudes de la PAC.

El pidimientu de rectificación producíase tres la xunta caltenida con distintes asociaciones del sector, la Federación d'Asociaciones d'Apicultores , Apicultores Acomuñaos del Principáu y Asociación Xixonesa d'Apicultura, qu'ente toos representen a más de 1.800 apicultores, y que treslladen a IX el descontentu y esmolición del sector yá que dempués de munchos años de reivindicación, por fín, l'apicultura entra dientro de les ayudes de la PAC como apicultura a la biodiversidá. Sicasí, el resolvimientu que saca la Conseyería dicta que solo van poder percibir eses ayudes quien tengan más de 80 truébanos, "lo que contradiz la mesma definición de biodiversidá, porque nun polinicen solo los que tienen 80 truébanos, sinón tamién los que tienen dos, trés o cuatro". Nel mesmu resolvimientu hai distintes temes que pueden perxudicar seriamente al sector apícola asturianu, recuerda la diputada d'IX. "Queremos que la conseyera esplique por qué fixo esti resolvimientu al marxe de les asociaciones d'apicultores y con estos criterios", diz la diputada sobro la interpelación d'IX.