Menu

El coordinador xeneral, Ramón Argüelles, y la eurodiputada Ángela Vallina axuntáronse güei n'Estrasburgo col comisariu d'Acción pol Clima y Enerxía, Miguel Arias Cañete, quien remarca que la Comisión europea caltién 2050 pa la descarbonización

Izquierda Xunida va presentar una proposición non de Llei por que'l Gobiernu autonómicu encamiente al Central a que solicite la inclusión d'Asturies dientro de los proyectos pilotos de la Unión Europea nes rexones del carbón. El coordinador xeneral de la formación, Ramón Argüelles, anunció, tres una xunta col comisariu d'Acción pol Clima y Enerxía, Miguel Arias Cañete, la so intención d'aprovechar esta vía pa llograr qu'Asturies aproveche tolos recursos comuñales empobinaos a llograr una transición xusta.

Argüelles allegó a Estrasburgo de la mano de la eurodiputada asturiana Ángela Vallina coles mires de conocer, de primera mano, la situación real del procesu de descarbonización y los planes de la Comisión Europea pa les rexones afectaes. Vallina, tees l'alcuentru, señaló que, a la vista de la situación, el Gobiernu asturianu tenía de “faer los deberes" pa llograr que la Comunidá Autónoma pueda aprovechar al máximu los recursos y les estratexes de transición de la Unión.

La posibilidá d'integrase ente les rexones con proyectos piloto tien de ser solicitada polos Gobiernos de los Estaos miembru, daqué que, reconoció Arias Cañete, nun fixo España. Argüelles, nesti sentíu, amosó la so sorpresa porque habiendo esta alternativa Asturies nun la plantegara, más porque hai solo unos díes producióse una xunta de les rexones del carbón" a la qu'asistió'l Conseyeru Isaac Pola. "Sospriéndenos que nun presentara nada. Nós vamos presentar una proposición non de llei (PNL) s la Xunta del Principáu d'Asturies por que'l presidente, Javier Fernández, mándelu xuna solicitú al al presidente Mariano Rajoy por qu'incluya a Asturies nesti vagón de cabeza de los proyectos piloto, porque tenemos que tar en frente pa, bien sía'l carbón xuna alternativa o nun lo sía, a lo menos les nueses cuenques mineres y Asturies nun queden arrezagada como siempres paez que nos pasa nestes situaciones".

Na xunta, Ángela Vallina recordó qu'el so informe sobro'l papel de les ciudaes y les rexones nel cambéu climáticu -aprobáu ayeri por aplastante mayoría nel Plenu d'Estrasburgo- hai un apartáu, precisamente por que se dean alternativa a aquellos territorios que como los del carbón van vese especialmente afectaos poles midíes pa poner frenu al cambéu climáticu. El Comisariu Cañete, esplicó la parllamentaria, "espúnxonos xunas alternatives y unos planes que van empezar agora y que ye'l momentu nel qu'Asturies agora y el Gobiernu (de Javier Fernández) tien que ponese les piles".

Na xunta, el Comisariu Miguel Arias Cañete aprofió que la Comisión caltién l'horizonte 2050 pa la descarbonización total magar almitió qu'esisten llínees d'investigación, sofitaes con fondos de la Unión, empobinaes a la busca de soluciones al impactu contaminante de los combustibles fósiles, como la captura del CO2. Del mesmu esplicó que la composición del mix enerxéticu dependía de cada país. Nun se-y esixe una determinada participación de cada tipu de combustible na xeneración d'enerxía sinon nel volume final d'emisiones contaminantes.