Menu

El diputáu d'IX esixi, per enésima vegada, la retirada, por seguridá, de les torres nos conceyos de Llaviana, Sobrescobiu y Casu

Ovidio Zapico, diputáu d'IX, alvirtió güei, una vegada más, esta vegada en see parlamentaria, del peligru pala seguridá de les persones y los bienes que tienen les torres y el cableaxe de l'antigua llínea eléctrica Lada-Velilla. Esixó al Gobiernu del Principáu más firmeza na esixencia al Estáu de la retirada d'una llínea qu'empezó a asitiase en 1986 y hai más de 14 años que se sabe nun va entrar en funcionamientu y la revisión del trazáu.

“Tenemos enriba de de les nueses cabeces auténticos amasaos de fierros y llátigos kilométricos”, alvirtió'l diputáu d'IX na comparecencia del Conseyeru d'Emplegu, Industria y Turismu, Isaac Pola, a solicitú de la mesma coalición. Los problemes que puen causar como nun se desmantelen de forma ordenada y rápida puen ser impredicibles, esplicó de la que recordó los problemes que yá dio demientres la nevada de febreru una torre en Llorío, Llaviana, ensin que Rede Eléctrica Española fixera nada para solucionalo.

El diputáu d'IX punxo en dulda que REE diera en la revisión de la rede nel Parque Natural de Redes l'añu pasáu, como dixo'l Conseyeru. Ye más, espresó les series duldes d'IX de que nunca se fixo nada”, sacantes emitir meros informes o faer un arreglu cuando una torre sufrió un sabotaxe.

Ovidio Zapico tamién esixó al Conseyeru qu'estreme los dos alderiques, el de la retirada de la llínea Lada-Velilla y el del proyectu de construcción de Sama-Velilla. Venceyar la execución de la segunda cola retirada de les torres del antiguu trazáu, que mentó'l Conseyeru y fai tamién el Gobiernu del PP “ye un chantaxe permanente al Gobiernu del Principáu”, dixo Zapico. Ye “inasumible ya intolerable tener de rehenes a los territorios y a los habitantes de Llaviana, Casu y Sobrescobiu”, clamó de la que repitió la urxencia de más acciones per parte del Executivu Asturianu, “non solo por cuestión medioambiental, sinón por seguridá”.

El conseyeru d'Industria, pela so parte, aseguró que “nun ye almitible nin comprensible” que nun se procedió yá al esmantelamientu de la llínea eléctrica entre Lada y Velilla, situación que llevó al Gobiernu asturianu a esixir en distintes ocasiones al Executivu central que lu execute cuanto antes. De la mesma, dixo sentise “cafiante” cola falta d'acción per parte del Gobiernu central.