Menu

Genaro Alonso compromete con IX tomar midíes y reconoz qu'esiste una clara área de meyora

La diputada d'IX, Concha Masa, denunció esta mañana na Xunta xeneral la inesistencia de personal d'orientación nos centros de Formación Profesional (FP) n'Asturies, personal sicopedagóxicu que solo esiste nos Institutos d'Educación Secundaria Obligatoria. Masa alvirtió qu'a estos alumnos, como diz la norma, asegúrase-yos l'accesu pero non la permanencia y la progresión porque fai falta personal pa garantizar estos recursos especializaos. “Nun hai figures de tipu profesional nin tampoco a los profesores dótase-yos de recursos pa enfrentase a situaciones d'esti tipu”, dixo la diputada ante Genaro Alonso, conseyeru d'Educación. Inclusive, esplicó hai ONG,s que tienen qu'empobinar a profesores en situaciones conflictives, “lo que nun ye más qu’una chambonada”, porque se precisen orientación pa los alumnos y pa el profesores. La paradoxa, aseguró, ye qu'un alumnu, por casu, con dislexa en Bachilleratu tendría atención especial, pero de casualidá na FP nun lo tien.

Masa demandó que'l Principáu cumpla les lleis, como lo pide la Xunta de Personal Docente y la Plataforma de sofitu a la diversidá y que “tome midíes cuanto antes”.

Genaro Alonso comprometió midíes pa solucionar esta situación, reconociendo que nos centros integraos nun hai personal d'atención sicopedagóxica y esiste “una clara área de meyora”. Alonso reconoció qu'estos alumnos son atendíos pol equipu d'orientación de la zona o'l rexonal.