Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

16/04/2018

La diputada Eva García Sempere noma d'operación de 'marketing' el PGE que nun resuelve nin la fienda social nin territoral

La parllamentaria d'IX per Málaga participó esta tarde nun taller del grupu confederal de Xuníos Podemos pa percanciar enmiendes al presupuestu estatal

Jaime Gareth Florez denuncia que les cuentes del estáu suponen un chantaxe y alerta de que n'ayudes a les cuenques mineres nun se cumplen les promeses del Gobiernu

Roberto Sánchez Ramos critica que s'escaezan partíes imprescindibles para'l Prerrománicu Asturianu o de patrimoniu industrial

Los presupuestos xenerales del estáu para 2018 anunciaos pol Gobiernu d'España son una “operación de marketing” que suponen, amás, un chantaxe a Comunidaes como l'asturiana, pos s'amiesta a la so aprobación la devolución a les arques autonómiques 116 millones de los impuestos recaldaos nel territoriu. La diputada d’IX Málaga, del grupu confederal de Xuníos Podemos nel Congresu, Eva García Sempere, aseguró güei n'Uviéu que, más allá de los titulares, los grandes retos pindios queden por resolver. Un exemplu, dixo, ye la xubida de les pensiones, especialmente les más baxes, que lo único que va consiguir ye tan modesta medría que nun va evitar que sigan siendo percepciones de “miseria”.

Les cuentes vienen precedíes, amás, pola baxa execución de les pasaes, nes que se dexaron de gastar importantes partíes a pesar de la so necesidá. Asina, en dependencia dexáronse ensin executar 40 millones y eso a pesar de que, denunció la diputada, “muerren dos dependientes ensin recibir l'ayuda cada 15 minutos. Tamos falando d'unes cifres verdaderamente clamorosas por que esti Gobiernu punxera les piles y trabayara realmente para acabar cola fienda social y los desequilibrios territoriales, pero paez que, una vegada más, tenemos una oportunidá perdida”

Tampoco les partíes de Fomentu salen bien paraes. Nesti casu, la parllamentaria denunció que se trataba de propuestes yá comprometíes, nuna repetición que ta bien per debaxo de lo que los territorios demanden.

García Sempere participaba esta tarde n'Uviéu nun taller de Xuníos Podemos pa percanciar enmiendes a los presupuestos xenerales del Estáu. Al pie de ella, el responsable de converxencia d’IX Asturies, Jaime Gareth Florez, aportunaba nel impactu negativu d'estes cuentes p’Asturies, que nun algamen la media de les inversiones previstes n'otres Comunidaes, quedando escluyíes o deficientemente financiaes obres clave como la rede de cercaníes, la continuación de l'A-63, el Plan de Víes de Xixón, ronda Norte d'Avilés o'l plan de Víes de Llangréu.

Tampoco se llibren del maltratu les cuenques del carbón. Nesti casu, Jaime Gareth Florez foi tayante: “ye'l presupuestu de la mentira pales cuenques mineres: malpenes 40 millones de les tresferencies de reactivación de les Cuenque Mineres, bien llueñe de los 127 millones anunciaos nuna de les sos visites pol Ministru d'Enerxía, correspondientes a los Fondos Mineros nel Plan 2013-2018 y nin rastru de los 213 millones d'euros debíos –en referencia a los yá reconocíos xudicialmente-”

N'ámbitos locales, el conceyal d'IX n'Uviéu, Roberto Sánchez Ramos, denunció l'ausencia de la ciudá nes cuentes xenerales del estáu. ¿Tienen que figurar toles ciudaes nel Presupuestu? Preguntó na so intervención el conceyal, pa de siguío añedir que la capital d'Asturies tien fechos diferenciales que xustificaríen esi apueste de l'alministración central, en cuestiones como'l Prerrománicu Asturianu, que precisa inversiones urxentes, o n'otres cuestiones relatives al patrimoniu industrial que, sollertó, de nun apostase pol mesmu terminará per ser “arqueoloxía industrial”.

Volver

Compartir

2014 Izquierda Xunida d'Asturies - Política de privacidad - Política de cookies