Menu

L'aplicación del Real Decretu supondría aterrizaxes a palpu pa servicios d'emerxencia, sanitarios y protocolarios, lo que nun garantiza la seguridá a xuiciu de Llamazares

La Xunta Xeneral del Principáu encamienta al Conseyu de Gobiernu a que se dirixa al Gobiernu de la Nación con cuenta de que esti realice les xestiones oportunes al traviés de AENA y ENAIRE pa llograr que se caltengan nel Aeropuertu d'Asturies los servicios de control y tráficu aéreu ATS/ATC a los vuelos d'emerxencies sanitaries. Tolos grupos parlamentarios, sacantes el PP, esixen al Gobiernu nacional que ponga fin al proyectu d'acutar los servicios de controlador al horariu diurnu ya impliquen pa vuelos como los sanitarios, los de tresplantes, emerxencies o protocolarios, aterrizar a palpu nel aeropuertu d'Asturies n'horariu nocherniegu, una vegada cerrada la terminal.

Gaspar Llamazares, voceru parlamentariu d'IX, esixó'l caltenimientu de los servicios de controladores pa facilitar l'aproximamientu y l'aterrizaxe fuera del horariu d'apertura del aeropuertu pa garantizar la esistencia y la seguridá de los vuelos de tresplantes, d'emerxencia y protocolarios, como vien asocediendo dende hai 20 años. Llamazares fixo un llamamientu a que los aeropuertos pequenos nun pierdan competencies fruto de la privatización de AENA y ENAIRE, que nun contrató controladores abondos pa caltener los servicios actuales, por culpa de que se ta produciendo un repique del tráficu.

Llamazares recordó que'l Gobiernu xustifica esti Real Decretu na reordenación del sistema aeroportuariu, que, a xuiciu del diputáu, tien que ver cola privatización de ENAIRE y AENA. “Ta perdiéndose la disponibilidá pública de los aeropuertos, de los aeropuertos pequenos que se veníen compensaos polos grandes y que ven que yá tienen privatizaes les sos torres de control”, alvirtió.

Llamazares recordó que nuna respuesta a les sos entrugues Enaire diz que nun ye segura la supresión prevista pa ochobre, cuando ta publicao nel Real Decretu, sinón que van faer un proyectu piloto d'aproximamientu en Menorca, cuando ye un aeropuertu que nada tien que ver col d'Asturies, que tien unes condiciones bien específiques. La so aplicación significaría que se desconecta l'avión a les torres nel Cordal, pierde'l control de Madrid y nun tien control d'Asturies y aterriza so responsabilidá del pilotu, lo qu'a xuiciu d'IX “nun garantiza la seguridá”.

Na mesma repuesta, la ONT (Organización Nacional de Tresplantes) tamién reconoz que nun se fía, y que como nun va haber seguridá nun va haber vuelos nel periodu de zarru. “¿Qué razón hai por que en un aeropuertu pequenu nun pueda haber un treslláu d'un órganu y sí nun aeropuertu grande como'l Barcelona?, preguntóse.

Llamazares tamién recordó que'l turismu ye una de les xoyes de la corona nesti país y apuntó qu'esti proyectáu retayu de servicios podría afectar a compañíes aérees que puedan decidir retayar tamién los sos servicios énte les escases prestaciones del aeropuertu. “Depués nun nos quexemos”, alvirtió. Otra d'eses xoyes, la Organización Nacional de Tresplantes podría decidir nun realizar vuelos cuando a 5.000 metros y a 60 kilómetros del aeropuertu quedar pal aproximamientu y l'aterrizaxe so la responsabilidá del pilotu. “La opción va ser que nun haya treslláu d'órganos”, dixo Llamazares, antes d'alvertir qu'esta situación tamién afecta a los vuelos protocolarios como los de la Princesa d'Asturies.