Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

30/04/2018

IX apuesta per Mieres pal grau de Deporte y esixe al Principáu que se defina

Llamazares reivindica l'equilibriu territorial y Áníbal Vazquez anuncia que nun va participar en nenguna xunta de l'Área Metropolitana Central mientres nun se resuelva la situación.

IX apuesta per Mieres p'acoyer el Grau de Deporte, tantu por cuestiones de política territorial como de desenvolvimientu d'un Campus anguaño infrautilizáu. El coordinador xeneral d'IX Asturies, Ramón Argüelles, y el voceru de la formación na Xunta Xeneral del Principáu, aconceyáronse esta mañana col alcalde Anibal Vázquez y los voceros de los distintos partíos na corporación mierense, nun intentu de percanciar sofitos por que, finalmente, la Universidá d'Uviéu decantese per esti conceyu pa impartir la especialidá.

Trátase, a xuiciu de Llamazares, d'una cuestión de “xusticia” y tamién por cuestiones operatives, por culpa de que nel Campus de Mires hai una inversión realizada que –dixo- “tien que ser rentabilizada” y por razones de política territorial”, daqué compartío pol rexidor de Mieres, qu'amiesta esa cohesión como una de les premises que tendríen de rexir pa la zona central d'Asturies. Nesti sentíu, Vázquez anunció que mientres esista esta situación nun se va incorporar a nenguna xunta de l'Área Metropolitana”.

Gaspar Llamazares foi bien críticu col executivu de Javier Fernández que, na so opinión, ta provocando “una situación enrarecida pola ausencia de criteriu per parte del Gobiernu Autónomu”. Pal voceru d'IX, una cosa ye l'autonomía de la Universidá, y otra bien distinta que'l Gobiernu emita un informe nel que se diga ónde, por xusticia, tien que tar el nuevu grau de deporte. “Y por xusticia, el Gobiernu sabe que l'únicu llugar, l'únicu allugamientu, ye'l Campus de Mieres. Por tanto, cuanto más tarde el Gobiernu en dar un criteriu que nun cuestiona l'autonomía universitaria, sinón que la desenvuelve, más peligru localista vamos tener”.

La definición del executivu autonómicu, añedió'l diputáu, tien que sirvir pa nun “enrarecer la situación dende'l puntu de vista local y pa nun dar un pasu pa tras en relación a l'Área Metropolitana Central porque si na primer decisión importante nun tien criteriu'l Gobiernu pocu podemos esperar”.

Aníbal Vazquez recordó que la decisión d'instalar en Mieres un Campus alcordárase, nel so día non yá como un espaciu de saber, sinón como un elementu clave pal tresformamientu de lo que fueren les cuenques mineres escontra un nuevu modelu. “Y 17 años dempués, tenemos un Campus cola metá d'estudiantes y la deriva que lleva esto, si daquién nun lo remedia, va ser que col tiempu cierre solu. Nun va faer falta que naide vaiga apagar la lluz”.

El rexidor mierense señaló'l so respetu a l'autonomía universitaria pero aportunó en que tamién había un compromisu col campus que ta por cumplir. “Guste o nun guste, la Universidá d'Uviéu tien trés campus”.

Pa Aníbal Vázquez, la reivindicación de fortalecer les instalaciones universitaries nun va en contra de naide y namái escuerre garantizar que'l campus desenvuélvase. “Esti alcalde nun va empezar una guerra absolutamente contra nengún conceyu, esti alcalde y la xente que m'acompaña tamos poniendo sobre la mesa por qué tien que ser el Campus de Mieres el que reciba la titulación. Na vida naide va escuchame a mi entrar a dicir que si esti Conceyu, otru o'l d'allá”.

Volver

Compartir

2014 Izquierda Xunida d'Asturies - Política de privacidad - Política de cookies