Menu

El coordinador xeneral d’IX Asturies, Ramón Argüelles, calificó güei los presupuestos xenerales del Estáu de “bien malu”, con importantes déficits como en materia de llucha frente a les violencies contra les muyeres, polítiques industriales, sociales o n'inversiones. El máximu responsable de la formación presentó güei, al pie de representantes de Podemos y Equo 85 enmiendes por un valor de 475 millones d'euros, empuestes a tratar de desaniciar unes cuentes claramente insuficientes para Asturies.

Ramón Argüelles alvirtió qu'estes propuestes alternatives a los presupuestos estatales “nun son la panacea” sinón “romiendos a un presupuestu mal fechu”.

La insuficiencia inversora, enfatizó el coordinador xeneral d’IX Asturies, ye daqué manifiesou, de forma que dende la patronal a los sindicatos amosaron la so decepción. Y ye que les grandes infraestructures queden ensin abondu financiamientu. Precisamente, les enmiendes traten de rectificalo, con partíes importantes palos planes de víes en Xixón, Avilés y Llangréu, autovía al Escayu, y otres empuestes a poner cuanto antes en marcha l'alta velocidá ferroviaria col pandu.

El coordinador xeneral d'IX quixo destacar la cooperación y collaboración ente les trés formaciones que demuestra que, a pesar de ser trés organizaciones distintes, “somos capaces ponenos d'alcuerdu”. De la mesma, y en contrapuntu, recordó que Ciudadanos llegara a un alcuerdu col PP pa llograr esti presupuestu "restrictivu" ente que, n'Asturies, dambes fuerces aliáronse pa dinamitar les cuentes pa 2018, inclusive no referío al creitu estraordinariu.

Al pie de Argüelles comparecíen los dos diputaos nacionales de Xuníos Podemos, Sofía Castañón y Segundu González, que, recordó'l coordinador xeneral d’IX Asturies, "son los nuesos tamién". Castañón enfeó les mentires" del PP y Ciudadanos tratando d'amazcarar unes cuentes que tienen poco de sociales y qu'abandonen materies como igualdá.

Pa Segundu González hai claramente una seca en materia d'inversión que trata de enxugarse con esti paquete d'enmiendes. Na rueda de prensa tamién comparecieron el secretariu de Podemos Asturies, Daniel Ripa, y la coportavoz d’Equo, Olga Álvarez. Ripa recordó que nun se trata solo de que sían unos presupuestos escasos sinón qu'amás vienen precedíos por otros igualmente insuficientes y que, depués, mientres la so execución, nin si quiera se cumple. Olga Álvarez fizo fincapié nel cambéu climáticu que rique d'inversiones que dexen correxilo, d'ende qu'incluyeren importantes partíes nes enmiendes empobinaes a meyores na rede ferroviaria