El voceru d'IX na Xunta Xeneral considera que se trata d'un executivu más fuerte de lo esperao, para durar y faer campaña electoral
Gaspar Llamazares, voceru parlamentariu d'IX na Xunta Xeneral, apuntó esta mañana que la mayor debilidá del nuevu executivu de Pedro Sánchez va ser el Congresu de los Diputaos, que lu va conceder 100 díes de gracia pero darréu va tener dificultaes para componer mayoríes. El Gobiernu, dixo Llamazares ye, de nuevu una sorpresa, más fuerte de lo esperao, para durar y bien mediáticu, pero cunta con una debilidá: que ye un Gobiernu unillateral nun parlamentu multillateral onde los alcuerdos precisen de delles minoríes. “Ese Gobierno nun paez que tienda la mano a un alcuerdu mayoritariu del Congresu”, esplicó a entrugues de los periodistes. La so principal debilidá va ser de nuevu'l Congresu de los Diputaos.
A Llamazares da-y la impresión de ser un Gobiernu para preparar la competencia colos sos principales competidores electorales y para una futura campaña electoral, más allá de les midíes de xestión que pueda adoptar.. La principal contradicción ye un Gobiernu dende perspectiva unillateral de centru o centru izquierda nun Parlamentu multillateral onde nin siquier ye representativu del conxuntu de la izquierda, valoró.
En relación a Asturies, Llamazares considera que la principal molición ye la del Ministeriu de la Transición Ecolóxica, que ye'l que más-y puede afectar, anque va ser una posición matizada pol restu del executivu. “Nun ye un bon mensaxe que l'únicu valor en materia enerxético sía cumplir colos compromisos de París”, retrucó para de siguío asegurar qu'esos compromisos hai que cumplilos pero eso “tien que ser vidable social y económicamente”. Esta cuestión ye lo qu'hai qu'intentar tresmitir dende Asturies al Gobiernu y a la nueva Ministra, dixo Llamazares na víspora de preguntar al Presidente del Principáu, Javier Fernández poles mires que tien el gobiernu que preside sobro la incidencia d'esti nuevu gobiernu nes grandes temes pindies d'Asturies, les infraestructures, el financiamientu autonómicu y la enerxía.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies