Menu

Los votos favorables a aliances acopen el 66,02% de les papeletes n'Asturies, y el 76,62% na media del Estáu

El sí llogró un 66,02% per cientu de votos frente un 30,95% de papeletes en contra nel referéndum sobro aliances electorales convocáu por IX Federal. La consulta cerróse con una participación del 31,2% del censu d’IX Asturies y estráyese del cómputu de votos emitíos en mesa y on line: de les 2329 persones que figuren nel censu asturianu, finalmente espresaron la so voluntá na consulta 727, que se resume en 480 favorables, 225 en contra y 22 votos que nun se decantaben por nenguna respuesta.

El sí foi la opción más votada ente esi terciu de la militantancia y simpatizantes -validaos éstos por IX Federal de forma directa- que participó nel referéndum. La cifra ye 8,54 puntos inferior a la media nel restu del Estáu, onde'l sí gano con un 76,62% de sofitos.

La participación nel últimu referéndum sobro estratexa electoral, entamáu por Izquierda Xunida d'Asturies el 30 de xunu de 2017, cerrose nel 45%, datu que se refier, n'esclusiva a votos de la militancia, yá que nesa ocasión nun se abrir la consulta a simpatizantes.

A lo llargo d'esta selmana hai la prevesión d’adoptar la fecha definitiva del referéndum específicu p'Asturies de confluencia electoral, una consulta pa decidir sobro alcuerdos nel ámbitu de la Comunidá Autónoma p'allegar a la Xunta Xeneral del Principáu y a les municipales. Nesti casu, como se recueye nel alcuerdu robláu esta mesma selmana ente IX Asturies ya IX Federal, les resultancies del próximu referéndum van ser venceyantes pa definir posibles aliances de cara a los comicios de 2019 n'Asturies.