Menu

El diputáu d'IX alvierte de que yá hai perdedores nel alderique de la transición enerxética, los trabayadores d'Asturlleonesa y les cuenques del Suroccidente

Ovidio Zapico, diputáu d'IX na Xunta Xeneral, denuncia l'aventadura de la Ministra Ribera en favorecer la nube económica perfecta contra Asturies, sobro la nuesa industria, el nuesu emplegu y los nuesos territorios. Utilizando una frase bien asturiana podemos afirmar que “Teresa Ribera nun ve sebe”, alvierte'l diputáu responsable de los asuntos d'Emplegu, Industria y Turismu. Al so xuiciu, Ribera ta empeñada en garantizar el fin de la minería pal 1 de xineru de 2019, quier adelantrar tamién tolo posible'l fin de la producción d'enerxía térmica, ensin rigor económicu, porque nun reconoz o nun sabe que'l fin de les térmiques va suponer una medría importante del preciu de la lluz pa les economíes doméstiques y pa la industria electrointensiva.

Asturies xuega bien d'ello nesti alderique de la transición enerxética y si salimos derrotaos del mesmu vamos poner un llastre enorme pal futuru de la nuesa rexón no que queda de sieglu, piensa Ovidio Zapico. Nun podemos perder esta batalla, alvierte'l diputáu d'IX.

Desgraciadamente, no único no qu'atina Teresa Ribera ye en que va haber perdedores na transición enerxética, diz el diputáu d'IX. Zapico camienta que yá ta habiendo n'Asturies perdedores, por casu los mineros del Suroccidente d'Asturies, especialmente estos díes los trabayadores de la compañía Asturlleonesa. Perdedores son tamién eses cuenques como la del Suroccidente, sangrada económica y socialmente. “Perdedor va ser el conxuntu de la comunidá autónoma si los negros nubarrones qu'anuncia esta Ministra cinxen sobre Asturies”, apunta.

El Partíu Socialista tien qu'esclariase y saber quién manda nesta materia. La primer incógnita ye saber cuál ye la tesis del Partíu, si la d'Adriana Lastra o la de la Ministra de la Transición Enerxética, Teresa Ribera. Eso ye lo primero que debe estremase porque nun valen paños calientes para encetar esta situación “bien grave y esmolecedora”, alvierte'l diputáu d'IX.

El Plenu del vienres 13 pa encetar la transición enerxética na Xunta va ser bien relevante. Ante xuna cuestión “vital” p'Asturies sería bien importante poder treslladar una posición unánime o mayoritariamente apolmonante énte la ciudadanía asturiana, adelantra Zapico.

Sobre la minería del Suroccidente y la minería asturlleonesa, el grupu parlamentariu d'IX va pidir xuna xunta cola nueva delegada del Gobiernu, Delia Llosa, pa tresllada-y la esmolición y saber qué va faer pa facilitar, na midida de lo posible, una salida a esta situación. “Queremos saber si van faer tanto ella como'l Gobiernu de Pedro Sánchez tolo que tea na so mano pa garantizar un contratu de suministros entre Asturlleonesa y dalguna compañía eléctrica”, describe'l diputáu.