Menu

Denuncia la esclusión nel documentu de zones como la de Navia, la falta de previsión d'episodios provocaos por vientu, les anomalíes nos procesos granibles o la organigrama d'intervención nel Principáu

El diputáu d'IX, Ovidio Zapico, y la conceyala d'Uviéu, Cristina Pontón, presidenta del distritu rural de Trubia, denunciaron que'l protocolu anticontaminación acabante aprobar pol Conseyu de Gobiernu asturianu esclúi'l bencenu na llista de sustancies que al disparase pueden activalo, un contaminante bien presente nel día ente día de los habitantes de Trubia, como asina demuestren los datos de la estación mididora. En palabres del diputáu d'IX, Ovidio Zapico, tratase d'una falta al conceyu d'Uviéu porque escaez un componente esencial nos procesos de contaminación de l’área de Trubia polo que pide la so inclusión como la de cualesquier otru elementu de los que se tomen rexistros.

A xuiciu de Pontón el bencenu ye “problema antiguu, real y bien esmolecedor” pa los vecinos y los datos refundien evidencies de que la contaminación por esta sustanza en Trubia ye la más alta del país. La concejala y presidenta del distritu rural de Trubia entruga al Gobiernu de Javier Fernández “¿Por qué habiendo un problema, datos, alarma y un peligru para la salú nun s'inclúi'l bencenu nel protocolu?”. De la mesma, la concejala alvirtió de que nos allegamientos presentaos por IX yá figuraba l'alvertencia d'incluyir el bencenu nesti llistáu ensin que fuera atendida, polo que pide una revisión del protocolu. L'orixe del bencenu en Trubia ye frutu de l'actividá industrial de les fábriques de Química del Nalón ya Industries Doi, que como recordó Pontón, tán faciendo inversiones para amenorgar esti problema. La llende aceptable ye de cinco nanogramos por metro cúbicu y en xineru, por casu, Trubia llegó a sufrir 17,1 unidaes.

Ovidio Zapico, qué reconoció meyores en protocolos d'actuación énte episodios de contaminación, esplicó qu'hai ausencies significatives nel mesmu. Nel protocolu siguen faltando los episodios que provoca l'acción del vientu, con exemplos bien significativos como les nubes negres d'El Musel; falta la incorporación al protocolu de les anomalíes nos procesos granibles, una cuestión bien importante; tampoco tien en cuenta tolos contaminantes que miden les estaciones mididores, y siguen ensin incorporase zones industriales n'Asturies que nun tán nel centru de la rexón, como pue ser Navia, que n'ocasiones presenta problemes en materia de contaminación, y tampoco figuren. IX echa en falta un organigrama d'intervención per parte de l'alministración pública, sobro cómo tien qu'actuar con rigor cuando hai qu'activar los protocolos. Esperamos que s'incorporen en futures revisiones y ensin que pase muncho tiempu, esplicó Zapico na Xunta Xeneral.

A lo último, el diputáu qu'alvirtió un xiru” nel Principáu tocantes a la forma d'enfrentase a la contaminación tamién lu convidó a nun baxar la guardia cuidando que queda enforma por faer pa llograr l'harmonía ente la industria asturiano –qu'IX reclama como fuerza político con vocación industrial- y l'Asturies Paraísu Natural cola que tien de conciliase. “Ye necesario avanzar n'embrivir los riesgos de l'actividá industrial porque son argumentos pa cerrar la puerta a posiciones fundamentalistes y ecolliberales qu'en nada ayuden al desenvolvimientu industrial , y n'ocasiones, xeneren medranes infundaes en redol al corazón industrial de la rexón, que tien de tener un clima d'aselu, pero tamién de respetu a les normes y eso llógrase tamién con prevención ya inspección”, concluyó'l diputáu d'IX.