Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

07/08/2018

IX demanda una medría del presupuestu del SEPEPA por que sía eficaz na llucha contra´l paru

Ovidio Zapico considera que l'organismu nun ye funcional a xulgar pol númberu de paraos n'Asturies y los diagnósticos, asesoramientos y emplegos qu'ufierta

IX demanda un refuerzu económicu del Serviciu Públicu d'Empléu d'Asturies (SEPEPA) p’aumentar el so personal especializáu na orientación y busca d'emplegu, la definición de la función de cada trabayador del serviciu, el refuerzu de les oficines perifériques por qu'empresten los mesmos servicios, independientemente d'onde tean allugaes y estableza una ratio d'orientadores llaborales por oficina basáu en criterios como'l númberu de paraos y el númberu de programes que desenvuelven. A xuiciu del diputáu d'IX, Ovidio Zapico esti serviciu nun cumple los oxetivos colos que foi creáu, nun ye operativu nin funcional, nin tien una organización eficiente, amás de nun ufiertar los mesmos servicios en toles oficines. L'oxetivu d'esti refuerzu ye revertir la situación que vive Asturies onde l'aumentu del númberu d'afiliación a la Seguridá Social ye menor que'l descensu del númberu de paraos, una cuestión solo esplicable pola perda de población activa y la perda de población polo xeneral, “sangría que tenemos d'evitar”, según Zapico.

Asturies cerró'l pasáu mes de xunetu con 68.000 paraos, una cifra “insostenible” nuna comunidá que pretende ser parte d'un estáu del bienestar, con unos componentes que se reflexen dende los últimos años y se ejemplifican na última GUO (Encuesta de Población Activa), que ye que l'aumentu d'afiliaciones ye menor que'l descensu de la tasa de paru. Esta cuestión solo puede esplicase dende dos puntos de vista y dambos esmolecedores, dixo'l diputáu na Xunta Xeneral. Per un sitiu, baxa la población activa n'Asturies y, por otru, porque la comunidá pierde población. Amás el descensu del paru faise en base a la temporalidá y vese con especial incidencia nel mes de xunetu, onde baxó 2.500 persones, pero'l 90% d'ellos contratos temporales acomuñaos al sector del turismu. Amás, apuntó que la temporalidá nun trai estabilidá, sinón precariedá llaboral.

“Ye bien importante nesta coyuntura'l papel del SEPEPA nel asesoramientu, acompañamientu y busca d'emplegu a los paraos”, alvirtió Zapico que, sicasí, tamién esplicó que viendo'l númberu de diagnósticos añales que realiza, les actuaciones individualizaes y el porcentaxe d'allugamientos que llogra –n'especial na población xuvenil- “podemos dicir qu'el SEPEPA nun cumple, nun ye operativu”.

Esta demanda qu'incide en cuatro aspeutos: la medría de presupuestu pal próximu exerciciu, la definición del organigrama, el refuerzu de les oficines perifériques por que tolos paraos tengan les mesmes oportunidaes, y la implantación d'una ratio d'orientadores llaborales, reflexar n'una Proposición Non de Llei que se va tratar al entamu del próximu periodu de sesiones na Xunta Xeneral. “Queremos que'l Gobiernu tome cartes nel funcionamientu del SEPEPA”, concluyó Zapico.

Volver

Compartir

2014 Izquierda Xunida d'Asturies - Política de privacidad - Política de cookies