Menu

El voceru d'IX na Xunta Xeneral pide la comparecencia del presidente d'HUNOSA

El voceru d'IX na Xunta Xeneral del Principáu, Gaspar Llamazares, reprochó güei al xefe del Executivu español, Pedro Sánchez, la falta de respuestes clares que dexen estenar los riesgos qu'escolguen sobro Asturies y la so industria de resultes de la descarbonización exprés. “Al respective de la transición enerxética, pasemos de la retórica a la grandilocuencia: dicir qu'HUNOSA va convertise na vanguardia de la transición enerxética, sabiendo los asturianos como sabemos lo qu'asocedió cola diversificación d'HUNOSA, pos nun dexa de ser retórica y en dellos casos grandilocuencia que nun se compadece n'absoluto con espayar les incertidumes qu'en materia de carbón y en materia d'enerxía sigue habiendo nesta Comunidá Autónoma. Por tanto, esbardióse una oportunidá per parte del Gobiernu Central pa comprometese con Asturies”.

Y nun foi meyor la intervención de Sanchez no referío a los grandes proyectos pindios, por culpa de que nun s'esclariaron los cronogramas d'execución y finalización. “Nun sabemos un res del calendariu y si tenémonos qu'atenemos a lo dicho pol secretariu d'Estáu, tenemos más incertidume que teníamos”.

Pal diputáu, la situación complícase entá más pol panorama particular del PSOE Asturianu que, esplicó, apaez como una fuerza emerxente más al asitiase al marxe del so propiu Gobiernu.

Sía que non, y énte les incertidumes que se caltienen, IX va dirixise al Presidente d'HUNOSA por qu'esplique en qué va consistir esi “lideralgu de la transición enerxética”, pa lo que yá se solicitó la so comparecencia énte la Xunta Xeneral del Principáu.