Menu

L'apicultura ye un sector estratéxicu pal mediu rural y nun pue escaecese la parte ambiental

La diputada d'IX na Xunta Xeneral, María José Miranda, reclama al executivu asturianu midíes pa compensar a los apicultores asturianos de les graves perdes sufríes na última campaña apícola. María José Miranda reconoz la infortunada recueya de miel y polen de los truébanos na mayoría de les esplotaciones anguaño por cuenta de les condiciones climatolóxiques y los elevaos costos que los apicultores sufragen hasta'l momentu y que van tener que siguir costeando pa caltener les colonies, tal como esplica tamién Promiel Asturies. La diputada d'IX tamién apunta qu'esisten seguros pola seca pero non pola escesiva agua, el mugor o les baxes temperatures que faen que nesta temporada dellos apicultores nun recueyan nin un quilu de miel, o nel meyor de los casos, la producción nun llegue nin a la tercer parte del añu pasáu. Miranda reconoz la necesidá de sofitu al sector y de que los fondos destinaos a l'apicultura nun se pierdan y aplíquense realmente. “L'apicultura ye un sector estratéxicu pal mediu rural asturianu ensin escaecer la parte ambiental que regalen cola so actividá a tola población”, afirma Miranda, Vicepresidenta de la Xunta Xeneral.