Menu

El voceru d'IX alvierte la fusión de dambes ye “una fuxida escontra alantre para refugar responsabilidaes” énte les perdes nos últimos años

Gaspar Llamazares, voceru parlamentariu d'IX na Xunta Xeneral, entruga al Gobiernu asturianu cuálos son les resultaos en proyectos d'investigación, cuál la cofinanciación de los mesmos y el balance económicu de l'alianza de collaboración ente les fundaciones ITMA y Prodintec nos postreros seis años, circunstancia que respuende por la fusión anunciada nes últimes feches. Llamazares recuerda que como antoxana de l'anunciada fusión de ITMA con Prodintec establecióse va seis años una alianza de collaboración que traxo una dirección única y l'usu compartíu de distintos equipos y de técnicos, ensin algamar unos oxetivos realmente satisfactorios, habida cuenta de qu'en cuenta de xenerar valor, volume de negociu y sinerxes, lo cierto ye que sirvió pa llastrar la resultancia conxunta de dambes fundaciones, hasta'l puntu d'incurrir en perdes nos dos últimos años (particularmente graves l'añu pasáu). En 2017, la resultancia conxunta de dambes fundaciones ye d'un déficit de más de 292.000 euros.

Esta grave cayida de los beneficios económicos, producida amás nun contestu d'espansión económica, revela la deficiente xestión desenvuelta pola Dirección qu'agora pretende una fuxida escontra alantre pa refugar la so responsabilidá nuna suerte d'operación Gatopardo, pa camudar too y que too permaneza, alvierte Llamazares. Esta fuxida ye porque l'alianza producida ente dambes empreses dende 2011 nun ye nin un aval nin en términos económicos nin d'investigación pa la futura fusión, esplica tamién Llamazares. Al so xuiciu, ye una fórmula pa refugar responsabilidaes, porque creemos qu'esisten na mala xestión de dambes, particularmente en ITMA, que provocó, de resultes, xuna perda de ganancies nos últimos tiempos y un retrocesu en relación a los proyectos d'investigación y la cofinanciación tanto nacional como europea.

El voceru parlamentariu d'IX na Xunta Xeneral solicita énte esta situación la comparecencia de la Directora Xeneral d'Innovación y Emprendimiento y del Conseyeru d'Emplegu, Industria y Turismu na correspondiente Comisión de la Xunta Xeneral pa informar sobremanera lo relativo a esta fusión.