Menu

Ovidio y José Manuel Zapico faen fincapié na importancia de la factoría y l'emplegu que xenera n'Asturies y espera que nun se produza nengún trauma llaboral

Ovidio Zapico, diputáu d'IX, responsable de los asuntos d'Industria, y José Manuel Zapico, Secretariu Xeneral de CCOO d'Asturies, coincidieron esta mañana en señalar la necesidá d'entainar la construcción de les bateríes de coque de Xixón pa sustituyir les vieyes bateríes de la factoría d'Arcelor-Mittal n'Avilés, qu'ayeri sufrieron una quema. A xuiciu de José Manuel Zapico esti accidente ye “una situación de máxima gravedá” pa la qu'hai que felicitase de que nun hubo nengún dañu personal, de que'l plan d'emerxencia funcionó y les midíes de seguridá y salú tamién. Una valoración similar a la del diputáu d'IX quien apuntó que les condiciones meteorolóxiques fueron favorables y nun supunxo una medría de los índices de contaminación.

Los dos dirixentes, d'IX y de CCOO d'Asturies, fixeron especial fincapié na importancia de la factoría d'Arcelor-Mittal y nel emplegu que xenera n'Asturies. En palabres d'Ovidio Zapico “ la máxima esmolición” son les posibles repercusiones que nel emplegu puedan causar la perda d'eses bateríes y que con celeridá, entren en funcionamientu les bateríes de Xixón, y nun se produza nengún trauma llaboral na factoría d'Avilés. En boca de Zapico, que pidió precuru pa valorar les causes de la quema recordó que Comisiones Obreres alvirtió en payares de 2017 de que si nun había una inversión clara y nun s'entainaben los trámites burocráticos pa la instalación de les bateríes de coque en Xixón “podríamos tar en situación de riesgu”. Agora, esplicó José Manuel Zapico, con “muncho aselu y precuru”, esixe que se desbloquien les torgues burocrátiques, terminar cuanto antes les bateríes de Xixón y sustituyan de forma paulatina y rápida a les d'Avilés, pa garantizar l'actividá d'una empresa tan importante p'Asturies. El Secretariu Xeneral de CCOO d'Asturies realizó, a lo último, un llamamientu a la reflexón de les fuerces polítques y sociales “qu'aprovechen cualquier oportunidá pa poner en tela de xuiciu” unes instalaciones tan importantes como les d'Arcelor, de les que dependen una gran parte del emplegu de calidá y con derechos “de los qu'Asturies nun puede prescindir”.