Menu

El coordinador xeneral d’IX Asturies, al pie de los máximos representantes de la formación na cuenca d'Avilés pidieron unidá pa buscar soluciones y garantizar el futuru de la empresa

Izquierda Xunida esixó güei n'Avilés una solución que torgue'l zarru d’Alcoa y que dexe garantizar el futuru de la industria asturiano. El coordinador xeneral d’IX Asturies, al pie d’alcaldes de Castrillón, Illas y les voceres municipales n'Avilés, Corvera y Gozón, ufiertaron esta mañana una rueda de prensa conxunta pa demostrar la unidá clara de la formación na defensa de la continuidá d'esta compañía. Argüelles reprochó güei les polítiques de les últimes décades, basaes en privatizaciones de sectores estratéxicos o con un cambéu de modelu enerxéticu que, amás, puede poner en peligru otres compañíes d'altu consumu eléctricu. Sía que non, IX va plantegar que s'estudien toles víes, incluyida la reversión de la compañía al Estáu, si nun hubiera otres alternatives, por que la producción del aluminiu caltengase n'Asturies.

L'anunciu de zarru, aseguró Argüelles, nun ye una sorpresa, pos la compañía yá venía amagando no que denominó una “agonía” que se produz dende va tiempu. “Van tenenos en frente a nós con quien quiera tar al nuesu llau”, afirmó'l coordinador xeneral d'IX, pa quien ye inconcebible que se produza una nueva reconversión ensin antes dar soluciones reales a los retos de empelo y actividá económica. “Hai que dicir dalguna vegada basta y dir a dicir güei alto y claro: Basta”.

Y ye que'l panorama llega mal por distintos frentes. Amás de lo relativo a la falta de compromisu de los grandes conglomeraos multinaciones colos territorios, Argüelles aludió al mesmu modelu enerxéticu y, tamién, a la vía que s’abre por que en territorios como'l d'Euskadi puedan ponese mecanismos p'abaratar la eletricidá, lo que supondría una clara desventaxa pal restu de Comunidaes españoles. “¿Vamos axustar tamién con eso? ¿Vamos faer un dumping enerxéticu a ver quién paga más –en referencia a les ayudes que puedan establecese per cada Gobiernu autónómico- y en función de quien más pague allugar ende les industries? Eso nun ye serio dende un puntu de vista d'alministración. Eso un Gobiernu nun lo puede dexar”.

Frente al zarru anunciáu, Ramón Argüelles esixó al Gobiernu de Javier Fernández que se llante ante'l del PSOE en Moncloa pa dar respuestes. “Equí yá non val l'ensayu y erru que ta faciendo'l Gobiernu de Pedro Sánchez en munches materies. Esti erru significaría la condena d'Asturies per munchos años”.

El coordinador xeneral de IU Asturies tuvo tamién palabres para recordar los despidos de MONTRASA, venceyaos precisamente a Alcoa y que, a pesar de les sentencies xudiciales, siguen pleitiando no que yá ye un auténticu viacrucis llegal.

La esmolición ye máxima en tola cuenca avilesina. L'alcaldesa de Castrillón, Yasmina Triguero, reprochó la ineficacia del gobiernu (estatal) yá que, al so xuiciu, amuésase incapaz de solucionar los problemes esistentes non yá n'Asturies si non a nivel nacional. La rexidora reconoció qu'esistía una problema de costos d'enerxía pero tamién llanzó les sos crítiques para cola matriz de Alcoa que, aseguró, nestos años nun destinó recursos p'ameyorar la so propia eficiencia.

Alberto Tirador enfatizó’l peligru que'l zarru de Alcoa corada pa la contorna, magar aseguró que la incertidume sobro'l futuru del sector industrial venía de bien tras, yá col procesu de privatizaciones que supunxo una perda de la capacidá del Estáu pa marcar la política industrial que se suma, amás, a la falta de control sobro la enerxía.

La vocera d’IX Avilés, Llarina González, amosó'l so sofitu a tola plantiya de Alcoa y punxo la organización al so serviciu pa poder defender les sos reivindicaciones na cai y nes instituciones. “nun vamos aceptar el zarru de la fábrica”, atayó la conceyala que, amás, esixó que se pongan toles midíes pa evitalo.

Sara Paz Suárez, vocera en Corvera, aportunó na necesidá de revertir la situación, pa lo qu'hai qu'embaraxar toles alternatives, incluyida la reversión” de la empresa al Estáu pa garantizar el so futuru y caltener los puestos de trabayu.

Gozón, onde ta asitiada Alcoa, va perder más de 1 millón d'euros n'ingresos municipales. Sicasí, la vocera d'IX nesi conceyu, Pilar Suárez, aseguró qu'esa yera la menor de les esmoliciones, por culpa de que lo que, de verdá, ta en xuegu, son les persones que trabayen nesta empresa y que los sos puestos tán en xuegu. “Vamos lluchar y les families saber, porque tuvimos dende'l minutu unu siempres qu'hubo problemes; vamos tar hasta'l final y esperemos un final bonu pa toos esi trabayadores, families y pa tola contorna d'Avilés”.

Primeramente, la rueda de prensa diba cuntar cola presencia del voceru d'IX na Xunta Xeneral del Principáu, Gaspar Llamazares. Finalmente, la presencia del diputáu foi imposible una y bones, tamién na Cámara asturiana decidió encetase el zarru de Alcoa, según esplicó la secretaria de política municipal d'IX, Gabriela Álvarez.