Menu

El coordinador xeneral d'IX caltien l'apueste de la formación pol diálogu pa llograr unos presupuestos d'izquierdes.

El coordinador xeneral d'IX Asturies, Ramón Argüelles, llamentó güei la falta de compromisu del presidente Javier Fernández col procesu pa llograr la cooficialidá del asturianu, de la que reprochó la asuencia de soluciones para temes ingrientes como les infraestructures o la política industrial. Para'l máximu responsable de la formación, el xefe del executivu autonómicu, cerró la puerta para la reforma del Estatutu. "Ye una pena que'l presidente nun quiera reconocer, nin siquier nun xestu de despidida, pos que n'Asturies hai una llingua, que ye l'asturianu, que queremos que nel so momentu sía llingua oficial".

Ramón Argüelles pidió altor de mires y señaló que, siquier per parte d'Izquierda Xunida, nun se va utilizar la llingua como arma refundiza contra otros partíos: "gustaríanos qu'hubiera'l máximu consensu pa poder aprobalo y, si nun puede ser nesta llexislatura, como bien el nuevu secretariu de la Federación Socialista Asturiana (FSA) prometió, pos que pueda ser na siguiente".

Nesta primer xornada del Alderique d'Orientación Política, Ramón Argüelles amosó'l so prestu porque'l presidente reconociera los esfuerzos d'IX p'algamar alcuerdos. "Nun venimos equí solo a sacar réditos electorales, sinón que lo que nos interesa ye cumplir el nuesu programa electoral, les nueses lleis, servicios sociales, temes de trabayu, etc, y asina reconoció espresamente que, tantu en presupuestos como na Alizanza sobro Infraestructures pos tuvimos ende".

Y, anque esti sía l'últimu alderique de Javier Fernández, y a pesar de la fecha llende marcada polos próximos comicios de mayu, Ramón Argüelles enfatizó qu'IX va tar tamién nos próximos meses pa siguir buscando alcuerdos que dexen dar respuesta a les necesidaes de la ciudadanía. "Creemos qu'inda queda tiempu. Hai siete meses pa camudar la realidá asturiana y, por Izquierda Xunida d'Asturies nun va quedar aprobar un presupuestu d'izquierdes".