El diputáu d'IX sorraya l'ausencia de plan de viabilidá y les perdes económiques y de trabayadores
Gaspar Llamazares, voceru parlamentariu d'IX na Xunta Xeneral, alvirtió esta mañana nel plenu del Parlamentu que la fusión de los dos institutos tecnolóxicos ITMA y Prodintec nun ye más qu'una fuxida escontra alantre y xuna cortina de fumu para despintar, precisamente, el fracasu na xestión de les dos entidaes mistes d'investigación. Énte'l Conseyeru d'Emplegu, Industria y Turismu, Isaac Pola, alvirtió que nun esiste plan dalgunu de viabilidá de la fusión y que les resultancies de l'alianza que yá veníen protagonizando mientres los últimos años “son un fracasu en proyectos” y en perdes –alredor de 300.000 euros l'añu pasáu- que nun dexa nengún optimismu sobre'l futuru. Ye más, a xuiciu de Llamazares, los últimos años en ITMA significaron “una centrifugadora de talentu” yá que numberosos investigadores colaron, entre otros llugares, al País Vascu pa “mayor gloria de la so investigación”.
Llamazares tamién adelantró que los institutos d'investigación del Principáu apaecen nel nuevu Plan de Ciencia y Tecnoloxía por separao, esto ye, que nun taba prevista la so fusión nel últimu añu, y, amás, faise al nivel d'una empresa privada, l'Institutu Fernández Vega. Nesti sentíu acusó al Gobiernu asturianu d'intentar, dende va tiempu, dir borrando les buelgues del Principáu nestos institutos tecnolóxicos cuando son patronos directos ya indirectos del ITMA y Prodintec y tienen “ocho millones d'euros invertíos o soterraos nes instalaciones” y la so participación “nun ye menor”.
Llamazares tamién apuntó que la fusión que se va faer efectiva a finales d'añu nun cunta col sofitu de los trabayadores y que la Inspección acaba d'abri-yos un espediente por nun informar a los emplegaos. Para ejemplificar el númberu de proyectos de l'alianza entre ITMA y Prodintec el diputáu d'IX nun duldó n'amosar dende'l so escañu una fueya en blancu, dambos realicen proyectos dientro del Programa Asturies” pero nengún estatal nin européu.
A lo último, convidó al Conseyeru a que si nun quier responsabilizase d'esti fracasu “reclame les instalaciones” por responsabilidá pública y ponga enriba de la mesa non solo les lluces, sinón les solombres. De lo contrario, sería corresponsable del mentáu fracasu.
Pela so parte Pola realizó una “valoración positiva” de la fusión y apuntó que la participación del Gobiernu asturianu equival a un 33% nos órganos de dambes fundaciones y que les aportaciones directes son de 250.000 euros en ITMA y 200.000 añales en Prodintec, un 11% y un 4,9% del volume d'ingresos. En llínea colos argumentos de la empresa, aseguró les bondaes de la fusión y les perspectives d'aumentu d'emplegu cola fusión.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies