Menu

Ramón Argüelles y Adrián Barbón dan la bienvenida a Podemos a un nuevu escenariu de negociación y pactu

Izquierda Xunida y FSA-PSOE escenificaron güei el pactu presupuestariu pa 2019 y que, supon, en palabres del coordinador xeneral d'IX, Ramón Argüelles, cuntar con un presupuestu "netamente d'izquierda", daqué que, añedió, la formación vien intentando llograr a lo llargo de tola llexislatura. Argüelles reprochó a la presidenta del PP, Mercedes Fernández, la so roxura énte esti alcuerdu y la so falta d'empatía coles necesidaes reales de la sociedá asturiana. "El PP, si nun ye quitar l'impuestu de sucesiones, tolo demás son problemes: qu'ameyoren los servicios sociales, qu'ameyoren les prestaciones, ye un problema".

El sofitu d'IX foi xustificáu por Ramón Argüelles por culpa de que recueye bona parte de les reivindicaciones programátiques de la formación. L'apueste por llograr l'alcuerdu en materia presupuestario nun ye nueva, recordó'l so coordinador xeneral, quien aludió al pactu que yá se suscribió l'añu pasáu y que sicasí nun pudo salir alantre énte la falta de sofitu de Podemos. "nun vamos da-y vueltes a esto, vamos dicir qu'esti tien que ser el camín, vamos ser propositivos y dicir qu'esti ye l'escenariu nun pa güei, p'anguaño en concreto, sinón pa una llexislatura próxima. Tenemos que, les fuerces de la izquierda, intentar llegar a alcuerdos y apautar, dende la oposición o dende'l Gobiernu, pero a la fin lo qu'interesa que les midíes que s'aprueben llévense alantre y publí quense nel Boletín Oficial del Principáu d'Asturies",

Pela so parte, la secretaria de Política Institucional, Elsa Abargane, enfatizó el nuevu marcu d'entendimientu, diálogu y pactu que se abre y celebró que, "a lo último pudiérase llegar a los alcuerdos necesarios pa poder tener presupuestos n'Asturies". Valle, esplicó qu'esi esfuerzu yá s'afigurara, va un añu, nel alcuerdu IX-PSOE, con unes cuentes que xiraben a la izquierda pero que, "desgraciadamente", nun fueron posibles, tanto pol vetu de la derecha asturiana como, "inexplicablemente", por Podemos. Agora, a xuiciu de la secretaria de Política Institucional, ábrese un nuevu escenariu: "Podemos paez que superó'l tar fondiáu nel non y, a día de güei, paez que les fuerces progresistes dieron un pasu al frente p'abanderar unos presupuestos qu'ayuden a la meyora de los nuesos recursos, pa los servicios públicos fundamentales". L'oxetivu, añedió, ye "recuperar el pactu cola ciudadanía".

En cuanto al propiu documentu de presupuestos, llogróse "blindar" una partida de más de 143 millones d'euros que van dexar, precisamente exes d'acción contra la esclusión social, como'l Salariu Social, midíes contra la probeza enerxética, infantil o habitacional.

En materia impositivo, llógrase amontar l'impuestu d'actos xurídicos documentados que se fai, esplicó Valle, nun momentu onde esti gravame va recayer nes entidaes bancaries y non na ciudadanía.

Más allá del propiu alcuerdu presupuestariu, tanto Argüelles como Valle, aprofiaron la necesidá de caltener el pulsu lexislativu p'aprobar, antes de les elecciones de mayu la Llei de Derechos Vitales Básicos como una prioridá. Coles mesmes, apuróse a tratar d'aldericar y aprobar la Llei de garantía de derechos de llibre espresión de la identidá sexual y/o de xéneru (Llei Trans), y la Llei de Memoria Democrática.