Menu

El coordinador xeneral d'IX cree que la revisión tien de responder les nueves necesidaes y dar opción a que la ciudadanía decida ente monarquía o república

El coordinador xeneral d’IX Asturies, Ramón Argüelles apostó güei en L.lena por abrir l'alderique de la reforma constitucional, pa definir non yá el modelu d'estáu que tenemos sinón tamién pa superar cuestiones que, en 1978, nun foi posible poles circunstancies y coyuntura política del momentu. Aprovechando l'actu entamáu pol Conceyu l.lenizu, al qu'asistía convidáu na so calidá d'ex alcalde del conceyu, con motivu del 40 aniversariu de la democracia, Argüelles reconoció l'arrogancia y “valentía” que fixo posible la transición, especialmente na izquierda que, dixo, “dexó sos derechos pa nun tener confrontación”. Sicasí, al so xuiciu, llegó'l momentu de cavilgar sobro si la carta magna sigui respondiendo a toles necesidaes que llegaron tres estes cuatro décades.

De primeres, esplicó Argüelles, bona parte de la ciudadanía, como nel so casu, nun votó la Constitución, a pesar de tener yá 49 años lo que significaría que, na sociedá actual, la mayoría nun tuvo la oportunidá de refrendala.

Los cambeos de tou tipu esperimentaos nestos años xustificaríen esa revisión. “¿Por qué? Porque hai coses que se garanticen como la vivienda o'l derechu al emplegu que nun se recueyen. Ye obvio qu'hai muncha xente que nun tien vivienda, que nun tien trabayu. Hai otres coses como la memoria histórica y por que la xente escaeza hai que reparar y, nesti casu, la Constitución nun diz nada?

L'alderique, añedió'l coordinador xeneral d'IX, tendría d'incluyir tamién sobro'l modelu d'estáu, preguntar si, a día de güei, “tien sentíu tener monarquía o si ye'l momentu de dir pa escontra una república.

En cualesquier casu, concluyó Ramón Argüelles, “celebremos que tamos nuna democracia nestos 40 años y que la Constitución dea salida a problemes que nel so momentu nun los había pero que tán ende y que tenemos que da-yos una solución”.

Pela so parte, l'alcaldesa de L.lena y anfitriona del actu, Gema Álvarez Delgado estimó a los sos antecesores na Alcadía por estos 40 años de democracia, dempués, dixo, de décades de represión y tiranía. "Nunca m'imaxinara poder tener el privilexu de ser alcaldesa, precisamente ser la primer muyer n'ocupar el cargu. Primero que yo hubo tamién conceyales na corporación, y otres muyeres a les que quiero faer una mención especial, y que xugaron y xueguen un papel clave, fundamental ya imprescindible pa un Alcalde o Alcaldesa, que son les Secretaries d'Alcaldía, un puestu ocupáu tradicionalmente por muyeres. El so llabor diariu fai muncho más fácil el nuesu trabayu".