Menu

El voceru d'IX defendi una actitú positiva y constructiva frente al catastrofismo políticu y presupuestariu qu'incide na decadencia y la economía subvencionada

Esplicó tamién que'l futuru gobiernu merezse un primer presupuestu que se correspuenda cola mayoría d'izquierdes y el cambéu social qu'espresaron les urnes.

Gaspar Llamazares, voceru parlamentariu d'IX na Xunta Xeneral, cerró esta tarde cola comparecencia de la conseyera de Facienda y Sector Públicu, la vez d'esplicaciones del presupuestu pal próximu añu. Llamazares repitió qu'esti ye un presupuestu necesariu y posible p’Asturies, en contra de lo dicho por una patronal que nun escucha y conviértese en axitador políticu del bloque de les dereches. Ye, al so xuiciu, necesario frente a la repetición de la prórroga y colo l'esbarrumbe de la inversión, el paralís de la economía y el bloquéu y la degradación política. Amás, l'escenariu d'una segunda prórroga en períodu electoral sí que ye continuista ya indeseable, esplicó.

Na argumentación remanada esta tarde por Llamazares ésti alvirtió que ye'l presupuestu posible” per parte de la mayoría plural de la izquierda frente a la ficción populista conservadora del aumentu de gastos ya inversión con retayu d'ingresos, déficit y delda.

Llamazares recordó que precisamente too esto produzse nun contestu onde suple'l catastrofismo xuníu al iluminismu en relación a Asturies y al autogobiernu. “Ente l'afandu y la ficción. L'afandu de la política concreta y la ficción del independentismu o la señardá centralista”, concretó. El catastrofismo políticu y presupuestariu qu'incide na decadencia de la industria esistente, los impuestos y los servicios públicos como economía subvencionada o l’iluminismu sobro'l surdimientu dende cero del llamáu nuevu modelu de desenvolvimientu, nueves tecnoloxíes y enerxíes anovables.

Pela contra, dende'l grupu parlamentariu d'IX, dixo, defendemos una actitú positiva y constructiva porque la modernización d'Asturies va ser industrial, social y sostenible o nun va ser”. Les economíes más desenvueltes son aquelles que tienen un potente estáu social, dixo na última comparecencia de presentación de los presupuestos.

Al so xuiciu la primer responsabilidá de les Comunidaes Autónomes ye caltener y consolidar el so estáu de bienestar: la sanidá, la educación y los servicios sociales. “La inversión nun ye solo lladriyu y sofitu a la empresa”, remachó'l voceru d'IX. Estes son les premises coles qu'IX llegó a un alcuerdu de investidura y repitió en cada alderique presupuestariu y lexislativu.

Pal voceru parlamentariu, IX asitia a los asturianos primero de too, pero tamién esplicó que'l futuru gobiernu merezse un primer presupuestu posible que se correspuenda cola mayoría d'izquierdes y el cambéu social que votaron hai más de trés años. “Dende la investidura defendimos el pactu y el gobiernu plural de la izquierda”, aseveró.

Per primer vegada, el contestu del pactu estatal PSOE y Xuníos Podemos facilitó l'alcuerdu: en primer llugar polo que supón de clima de diálogu y hasta va pocos meses inesistente, ente les dos fuerces na política pal conxuntu d'España. Pero tamién polos conteníos sociales y el revulsivu a l'austeridá que significaron les bases sociales pal alcuerdu, matizó.

Tamién apuntó Llamazares les socesives negociaciones presupuestaries n'Asturies, y en particular l'últimu creitu estraordinariu de 2018, faciliten l'alcuerdu pa un presupuestu necesariu. Los sos conteníos sociales fueron tamién na mesma llínea del alcuerdu estatal: Salariu Social, enseñanza 0 a 3 y Universidá, inversiones en sanidá, mediu rural y cooperación local.

Ye'l presupuestu posible nuna llexislatura de lluces y solombres, con meyores en llucha contra la probeza dotando la llei de derechos, abaratamientu y estensión del 0 a 3, reorientando la sanidá escontra la primaria y lo sociosanitario; dotando'l conveniu cola Universidá y el futuru plan d'investigación; apostando pola ordenación del territoriu, la xestión de borrafes, la concertación social y el pactu pola igualdá; contra la violencia de xéneru y en defensa de la llingua, describió'l diputáu d'IX.

Pero tamién con solombres nel cayente del proyectu de la FSA, el lideralgu y la xestión en materies tan sensibles como les polítiques d'empléu, la investigación ya Innovación, el desenvolvimientu rural o la sanidá y en particular na área de la salú mental.

L'alcuerdu ye tamién un sacalliñu pa les aliances sociales y polítiques prioritaries, “vitales en defensa de la necesaria transición enerxétiques, ambiental, d'innovación y calidá nel emplegu de la industria y la economía asturiana”, siguió'l voceru d'IX.

Tratase col presupuestu tamién de sentar les bases de proyectu de futuru, unes bases mínimes d'enfotu pal gobiernu plural y los cambeos na próxima llexislatura basaos en: la defensa y renovación de la economía granible y l'emplegu calidable; la igualdá de xéneru; la ordenación del territoriu y la sostenibilidá.

Un nuevu modelu de xestión participativa; la política de cuidos pa los servicios públicos; la reforma fiscal… “Too ello nel marcu d'amplios alcuerdos de futuru en defensa de la industria, del sistema de financiamientu, les infraestructures y les reformes institucionales, tanto la electoral, la reforma del Estatutu y la oficialidá de la llingua”, dixo.