Masa sorraya que se trata d'unes cuentes posibles, realistes y d'utilidá pa la mayor parte de los asturianos
El Parlamentu asturianu aprobó, colos votos d'IX, Podemos y PSOE, les cuentes autonómiques pa 2019 con un montante económicu de 4.524 y refugó toles enmiendes rexistraes polos grupos de la derecha. Concha Masa, vocera axunta d'IX na Xunta Xeneral, espresó esta mañana nel Parlamentu'l prestu de la coalición por haber consiguío, anque sía a la fin de la llexislatura, disponer d'un “bon presupuestu”, d'izquierdes, que va xenerar emplegu, anque nun sía perfectu y va dexar insatisfeches delles necesidaes, ye, a lo último el presupuestu posible, realista, frutu d'alcuerdos parlamentarios y va ser d'utilidá pa la mayor parte de los asturianos.
Ye un presupuestu, dixo Masa, que fortalez los servicios públicos, qu'avanza n'aspeutos educativos importantes, como na universalización d'una escuela de 0 a 3 pública, algamadiza para toles families, por aciu unes cuotes razonables, con ampliación de la ufierta y tamién nel amenorgamientu de les tases de matrícules universitaries; qu'avanza tamién na reconocencia de los derechos básicos de tolos ciudadanos. Son unos presupuestos que creen emplegu y que, amás, creenlu calidable por aciu la convocatoria d'un númberu importante de places públiques n'educación, sanidá y otros servicios, puntualizó.
“Cuntamos con una bona base presupuestaria pa 2019 pa terminar la llexislatura implementando meyores sociales, reforzando los nuesos servicios públicos, realizando convocatories públiques d’emplegu y pa dexar sentaes les bases d'un próximu gobiernu, el que resulte de les elecciones de mayu de 2019, que va poer siguir trabayando con esti presupuestu y nun va heredar el corsé d'una prórroga presupuestaria”, sostuvo la vocera d'IX.
Nel so discursu Masa resaltó les enmiendes negociaes pola coalición, hasta última hora, pa intentar afaer el máximu, na midida de lo posible, la disponibilidá económica, presupuestaria, siempres insuficiente, a les necesidaes de tantos sectores de la sociedá asturiana que riquiríen de más recursos pa desenvolver afechiscamente les sos actividaes. En cuestión de cooperación al desenvolvimientu, un conceutu tan escaecíu nos últimos tiempos, so la escusa de la crisis, IX aseguró la medría del 8% sobro'l presupuestu efectivu de 2018, según contempla'l Plan de Cooperación apocayá aldericáu nesta Xunta Xeneral. Amás, la coalición movió 50.000 euros dientro de les mesmes partíes de cooperación con cuenta de eses cantidaes puedan aprovechase al máximu per parte de les ONG,s na xestión de los programes de cooperación
Nos Conseyos de Mocedá IX añedió otros 10.0000 euros partíos ente los Conseyos d'Uviéu y Xixón pa fortalecer polítiques de mocedá al traviés de los órganos locales más aparentes. Asina mesmu, complementó con 30.000 euros la subvención a la FAMPA, Federación d'Asociaciones de Mayores del Principáu d'Asturies, p'amosar el compromisu col apueste de programes d'avieyamientu activu en collaboración col tercer sector, como una midida d'oldeada eficacia na prevención de la dependencia y l'avieyamientu activu. Pa FASAD, Fundación Asturiana d'Atención a Persones con Discapacidá y Dependencia, IX consiguió un suplementu de 100.000 euros a l'aportación del Principáu nesta fundación pública.
Una aportación importante d'última hora son los 3 millones d'euros incorporaos al presupuestu pa desaniciar l'efectu que sobro les arques municipales de dalgunos de los nuesos conceyos podría suponer la necesidá de devolver los fondos recibíos pa desenvolver los planes d'empléu
Tamién se fixo un esfuerzu pola cultura nesti presupuestu. Inclúyense partíes pa rehabilitar la Ponte l’Arcu de Llaviana, pa desenvolver les investigaciones arqueolóxiques del castiellu de Gauzón en Castrillón, pa financiar el Festival de Música Festiamas… Y tamién pa potenciar el circuitu de teatru profesional, 250.000 euros, que cumple una perimportante llabor d'acercamientu d'esta manifestación de la cultura a los conceyos asturianos y que por cuenta de los últimos cambeos na xestión, a partir de la nueva llei de contratos públicos, sufrió un revés que podría emponer inclusive a la desapaición.
Nel capítulu de la I+D+I añedir una partida específica pa un tratamientu in situ de les borrafes que resulten de la eliminación del plumeru de la pampa, lo cualo podrá realizase por aciu técniques innovadores desenvueltes pol Institutu del Carbón, lo que va reforzar la imprescindible aportación de los presupuestos xenerales del estáu a la erradicación del plumeru de la pampa na Cornisa Cantábrica y tamién l'aportación al conceyu d'Uviéu pal saneamientu d'una zona del conceyu cercana a La Corredoria.
Al respective de les casi 300 enmiendes de los grupos de la derecha, dalgunes d'elles, dixo Masa, coinciden con enmiendes propies que fueron incorporaes al proyectu nel trámite de la ponencia, otres refiérense a cuestiones interesantes que efectivamente mereceríen más dotación presupuestaria pero los recursos son llindaos y siempres hai qu'establecer prioridaes. Otres enmiendes, sicasí, vense claramente inclinaes a privatizar servicios ya IX nun les va sofitar “de nenguna manera”. Otra gran parte de les mesmes son propuestes irresponsables, plantegaes cola clara intención de contentar a quien les reclamaba pero que nun son realistes y que claramente nun seríen incluyíes nun presupuestu ellaboráu pola derecha.
Masa nun dexó de poner n'evidencia, por realmente increíble”, que la derecha nun nuevu y cada vez más evidente exerciciu de demagoxa, venga equí, n'Asturies con propuestes d'inversiones de gratuidaes y de repartida, proponiendo de la mesma amenorgamientos d'impuestos na fiscalidá autonómica y, pa cuelmu, votando nel Senáu en contra del aumentu del oxetivu de déficit, que la so xubida repercutiría en 50 millones más p'Asturies.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies