Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

15/02/2019

Masa alvierte de la posible involución de la igualdá colos nuevos partíos

La vocera d'IX señala'l peligru de partíos que consideren que ta "too fecho"

Concha Masa, vocera parlamentaria d'IX na Xunta Xeneral, amosó la esmolición poles corrientes retrógrades ya involucionistes que realicen un discursu "bien peligrosu y sibilín" al respective de la igualdá de xéneru y la violencia machista, el de que too ta consiguío. La vocera d'IX alvirtió de qu'estos planteamientos que surden colos nuevos partíos son "bien peligrosos" cuidando que nun plantegen un enfrentamientu colos derechos, sinón el contrariu, el de que ta too consiguío y nun fai falta más. "Queda enforma camín por percorrer y les muyeres nun podemos detenenos nin dar marcha tras porque costó enforma trabayu y sacrificiu", alvirtió la vocera d'IX na vez d'entrugues al Presidente.

Masa preguntó a Javier Fernández sobro les meyores y perspectives del Gobiernu en relación al desenvolvimientu de les polítiques d'igualdá de xéneru n'Asturies y, bien particularmente, na llucha contra la violencia machista. La diputada d'IX que reconoció'l llabor del Gobiernu asturianu nes meyores nes polítiques de xéneru, ente ellos el Pactu Social Contra la Violencia sobro les Muyeres que cuntó col sofitu de tolos grupos, tamién apuntó aspeutos nos que ye necesariu un cambéu.

Masa citó qu'entá queda muncho camín por percorrer na presencia de muyeres na política y nos órganos de dirección de les empreses públiques y privaes, cuando namái representen el 27% en cargos de responsabilidá, esiste una fienda salarial que n'Asturies xube a más del 16% de la media nacional, y nel campu de la violencia machista queda enforma por trabayar. Casi 1.000 asesinatos en postreros 15 años n'España y con una tasa de feminicidios n'Asturies l'añu pasáu más alta de la media del país.

La vocera d'IX considera que ye obligada una auditoria del sistema contra la violencia machista cuidando qu'esixe dir al fondu del problema pola so complexidá, amosóse crítica coles unidaes d'igualdá que nun tienen efectividá y demandó'l funcionamientu real de les unidaes de valoración integral, por enforma que s'anuncien, y les adaptaciones nos xulgaos de violencia de xéneru, la formación del personal y l'escasu aprovechamientu del Conseyu Asturianu de la Muyer.

Volver

Compartir

2014 Izquierda Xunida d'Asturies - Política de privacidad - Política de cookies