Menu

El coordinador xeneral alvierte qu’al ritmu actual fadríen falta más de 20 años pa erradicar el desemplegu y llama l'atención sobro la mayor incidencia ente les muyeres.

El coordinador xeneral d’IX Asturies, Ramón Argüelles, llamentó güei la llixera xubida del paru en febreru, con 306 persones más nes llistes, y aseguró qu'estos últimos datos tienen que ser un morivo d'esmolición por culpa de que, a pesar de que nel interañal esperiméntase un descensu cimeru a los 3.600 paraos, a tal ritmu acabase cola lacra siquier en dos décades.

P'Argüelles, les cifres nun dexen allegría yá que el descensu nin siquier llega a la media española que taría casi 1 puntu percima na baxada del paru nel cómputu interañal.

Pa IX, afirmó Argüielles, ye prioritario llograr un mayor volume d'emplegu, con planes que dexen, per un sitiu, ameyorar la empleabilidá de les persones en paru, como, amás, el desenvolvimientu y dinamización de la economía granible.

El sector industrial tien de cuntar con tolos sofitos públicos y privaos como auténtiques locomotores pa la creación d'emplegu calidable. Sía que non, apostamos por un planteamientu global qu'esquice tolos nichos d'emplegu y actividá: los nuesos sectores primarios, con especial atención al mediu rural y la pesca, tanto no referío a la so orientación a les necesidaes de los mercaos internos como esternos pero, non menos importante, al desenvolvimientu agües embaxo, potenciando un sector agroalimentariu calidable.

Y en estos planes, la llucha contra'l paru feminín tien que ser prioritaria: el desemplegu afecta con mayor intensidá a les muyeres que, amás, son pior pagaes. Con esa ecuación, nun puede sosprender que, depués, les pensiones de les pensionistes sían inferiores. Como dicía, ye imprescindible poner midíes p'acabar cola fienda y llograr la igualdá efectiva. El 8 de marzu ta ende y col el día de la reivindicación de les muyeres que nun puede ser más qu’una llucha d'ési y de tolos díes.