Menu

Nota a la militancia sobro la posición adoptada por IX na Comisión d'Investigación de Cursos de Formación nel Parlamentu asturianu

1. Les decisiones del grupu parlamentariu nun se tomen de forma individual, sinón colectiva y, amás, d'eses decisiones ye parte la dirección d'IX d'Asturies, qu'allega semanalmente a les xuntes del grupu parlamentariu.

2. Respetamos fondamente la presunción d'inocencia, la separación de poderes y les responsabilidaes xudiciales, penales o alministratives que, nel so casu, podríen estrayese una vegada rematáu un procesu entá abiertu.

3. Refugamos que la Xunta Xeneral sía un tribunal inquisitorial contra los sindicatos de clase sobremanera contra'l nuesu sindicatu de referencia, CCOO.

4. Llamentamos que la Comisión nun sirviera p'avanzar no que realmente nos debe esmolecer: ameyorar la empleabilidá d'un colectivu pol que tenemos una especial esmolición, que son los nuesos paraos, y tamién ameyorar les polítiques de control si pudieren fallar.

5. Los servicios xurídicos del Parlamentu emitieron un informe nel qu'alverten que'l dictame cadez d'una falta de rigor de tala magnitú qu'el mesmu Lletráu de la Cámara alcuentra hasta 26 espresiones que tienen d'esaniciase por ser contraries nada menos que a la Xurisprudencia del Tribunal Constitucional. Y esto ye asina porque'l proponente atribúyese poderes propios del ámbitu xudicial, al calificar como delictivos o illegales de manera repitida comportamientos qu’una Comisión d'investigación parlamentaria nun puede realizar, por invadir les funciones propies de l'autoridá xudicial.

6. La falta de rigor manifiéstase tamién na presencia siguida de conclusiones estrayíes a partir de conxetures y non de fechos acreditaos nos trabayos de la Comisión. Nello tamién inciden los servicios xurídicos al falar de falta de verificación o calter especulativu de numberoses afirmaciones.

7. Tolos grupos parlamentarios, ensin esceición, refugaron la propuesta de borrador de dictame de Podemos.