Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

10/04/2019

Izquierda Xunida y UCA reivindiquen polítiques que garanticen la viabilidá y la rentabilidá del campu asturiano pa evitar la sangría demográfica

La nueva normativa de xestión de purinos puede poner en riesgu más de la metá de les parceles d'Asturies, al tener un 20% de pindio lo que les fadría inhábiles pal so abonu por esti mediu

La despoblación nes zones rurales solo frénase con midíes que dexen garantizar la viabilidá y la rentabilidá del campu asturiano, como vía xeneradora d'emplegu. Izquierda Xunida (IX) y la Unión de Llabradores Asturianu (UCA), axuntáronse güei pa faer una repasada a la situación del mediu rural y los retos a los que s'enfrenta de cara a la próxima llexislatura. Mas recursos pa indemnizar los daños de la fauna selvaxe, una revisión del modelu de xestión de purinos o acciones que dexen encarar la avispilla de la castañal que ta poniendo en xaque'l sector apícola.

La diputada y númberu 3 d'IX a la Xunta Xeneral del Principáu, María José Miranda, y el secretariu xeneral d’UCA, José Ramón García, 'Pachón', aseguraron güei que l'oxetivu d'estes midíes tien que ser llograr la viabilidá de les esplotaciones. "Ye un sector por demás importante pa esta Comunidá Autónoma y ye necesario siguir o buscar la llínea d'aumentar esa rentabilidá por que siga teniendo futuru". Ente eses cuestiones, los daños de la fauna selvaxe tienen un impactu bien negativu por culpa de que, esplicó, Miranda, les aportaciones de l'alministración namái cubren el 40% de los mesmos.

Unu de los grandes problemes nestos momentos pa la producción ganadera asturiana ye la xestión de los purinos. La nueva regulación que quier llevase a la práctica torgaría'l so usu como abonu en terrenes con rimaes cimeres al 20%, lo que supondría escluyir a 250.000 parceles, xuna cifra que la so importancia ver meyor, esclarió José Ramón García, si se tien en cuenta que'l númberu total n'Asturies ye de poco más de 400.000: "tamos falando de más del 50% de la superficie d'Asturies non puede abonase y, enriba, la superficie más pindia, que ye la que más precisaría y ellí tendríamos carba en cuatro díes".

El secretariu xeneral de UCA reclamó una xubida importante de les ayudes polos daños del llobu y del osu yá que, reprochó, nestos momentos los ganaderos pierden el 60 per cientu del valor de los sos animales cuando son atacaos por estes dos especies. Pachón criticó, nesti sentíu, la falta de compromisu del Principáu d'Asturies que, n'ocasiones, tres dellos informes favorables, el resolvimientu final ye negativu.

Parar la sangría de la despoblación tien que ser un oxetivu claru, enfatizó José Ramón García. Sicasí, les víes pa consiguilo nun pasen por poner más servicios si éstos nun lleguen acompañaos del emplegu. "Mientres nun llevemos camín de coloriar a la xente nel mediu rural da igual los servicios qu'asitiemos, ye una perda de dineru. Si nun ye rentable la esplotación por que puedan vivir ellí, tu puedes pone-y lo que quieras, más rápido va colar.

IXP Miel d'Asturies

La indicación xeográfica protexía (IXP) que se plantega pal miel d'Asturies ye, señaló Miranda, xuna cuestión que naide refuga. Sicasí, ye imprescindible, matizó, "una IXP que garantice unos controles calidables que certifique que realmente'l miel que se viende so esi sellu ye miel producío poles abeyes nesta Comunidá Autónoma y que tolos productores tengan la opción de formar parte d'esa IXP".

Sicasí, la producción de miel ta en peligru de resultes de la avispilla de la castañal que se ta estendiendo n'Asturies y que tien un impactu bien negativu na apicultura asturiana una y bones los mieles de meyor calidá son, precisamente, les que se collechen nesti hábitat. María José Miranda recordó que Galicia yá realizó delles meyores na materia, polo que reclamó que se busquen formes de collaboración. "Hai una serie de pruebes que se fixeron na comunidá vecina, en Galicia, con un bárabu qu'ocupa'l mesmu espaciu que la avispilla y qu'evitaría esi problema cola castañal". Nesti sentíu, aseguró que'l Serviciu Rexonal d'Investigación y Desenvolvimientu Agroalimentario (SERIDA) tien de siguir investigando nesa llinea y establecer si esi bárabu ye la solución, estableciendo si esisten, o non, efectos secundarios.

Volver

Compartir

2014 Izquierda Xunida d'Asturies - Política de privacidad - Política de cookies